Papa Francesku u bë i pari papë që i adresohet dhomave të përbashkëta të Kongresit në Shtetet e Bashkuara, ku iu rezervua një pritje e ngrohtë nga më shumë se 500 ligjvënës dhe zyrtarë të tjerë.
Ai u prit nga kreu i kongresit, John Boehner që edhe vetë është një katolik, e më pas u prit me brohoritje në sallën e kongresit.
Papa Francesku e nisi fjalimin me paralajmërimin për rreziqet e “ekstremizmit ideologjik”, duke vijuar me rëndësinë e mirëpritjes së refugjatëve. Papa tha se bota po përballet me një krizë refugjatësh që nuk është parë që nga lufta e Dytë Botërore dhe vuri në dukje se edhe mijëra njerëz udhëtojnë për në very, në Amerikë për të gjetur një jetë më të mirë.
“Nuk duhet të trembemi nga shifrat, por më shumë duhet t’i shohim ata si njerëz, të shohim fytyrat e tyre e të dëgjojmë historitë që na tregojnë, e të përpiqemi të bëjmë më të mirën në këtë situatë”, tha ai.
Papa Francesku e krahasoi punën e ligjvënësve me atë të Moisiut, duke thënë se ata kanë përgjegjësinë për të promovuar unitetin përmes ligjeve të drejta.
Kleriku i lartë tha se bota duhet të jetë e kujdesshme ndaj fondamentalizmit, qoftë ai fetar apo i ndonjë natyre tjetër dhe paralajmëroi kundër reduktimit të thjeshtë në gjykim mes së mirës dhe së keqes.
Ai preku edhe pabarazinë ekonomike duke thënë se edhe në vendet e zhvilluara, efektet e një strukture të padrejtë janë shumë të dukshme.
Me mijëra njerëz ishin mbledhur në Lëndinën Perëndimore të kapitolit me shpresën për të parë nga afër klerikun 78-vjecar nga Argjentina që ndodhet në vizitën e parë në Amerikë. /tesheshi.com/
