Autoritetet holandeze njoftuan në fund të korrikut se kanë mbyllur një fermë, pasi kanë gjetur përqendrime të larta të “fipronilit” në vezë, insekticidit të ndaluar për përdorim, për shkak të efekteve negative në shëndetin e njeriut, njofton Politico.
Autoritetet belge kanë hapur një hetim në qershor, por deri në korrik nuk e kanë njoftuar Komisionin Europian në lidhje me përdorimin e insekticideve të ndaluara. Gjermania, supermarketet e së cilës rregullisht pranojnë dërgesat e vezëve holandeze, ka nisur hetimet e veta në muajin korrik.
Zëdhënësja e Komisionit Evropian, Anna-Kaisa Itkonen ka thënë se Holanda, Belgjika dhe Gjermania, nëpërmjet paralajmërimit të BE-së për sigurinë e ushqimit, paralajmëroi edhe vendet e tjera që vezët e kontaminuara mund të jenë eksportuar edhe te ta.
Holanda paralajmëroi Suedinë për dërgesat e vezëve të kontaminuara në fillim të gushtit të dërguara atje, ndërkohë që paralajmërime të ngjashme janë dërguar edhe në Zvicër, Francë dhe Britani të Madhe, sipas Politico.
“Tani u takon autoriteteve suedeze, zvicerane dhe franceze që ata të kryejnë kontrollin”, tha ajo.
Fermerët holandezë kanë paralajmëruar se skandali me shitjen e vezëve të kontaminuara mund të marrë përmasa më të gjëra.
Kontaminimi kimik është kuptuar pasi fermerët e pulave në Holandë kanë kërkuar ndihmë nga shoqata “Chickfriend”, e specializuar për zhdukjen e parazitëve që sulmon pulat.
Kjo kompani në produktin e saj për zhdukjen e parazitit kishte përdorur përbërësin organik “fipronil”, i cili përdoret shpesh në preparatet veterinare kundër pleshtave, marimangave dhe rriqrave, por është i ndaluar në trajtimin e kafshëve që përdoren për ushqim.
Organizata Botërore e Shëndetësisë ka vlerësuar se “fipronili” në sasi të mëdha “është relativisht toksik” për njerëzit, sepse ajo mund të jetë e rrezikshme për veshkat, mëlçinë dhe gjëndrrat tiroide. /tesheshi.com/
