Kryetarët e tri partive të PAN-it, Kadri Veseli, Ramush Haradinaj dhe Fatmir Limaj, dhe ai i AKR-së, Behgjet Pacollit, nënshkruan në shtëpinë e këtij të fundit marrëveshjen për bashkëqeverisje. Kjo erdhi pasi partia e Pacollit, AKR, zyrtarizoi largimin nga koalicioni LAA.
Krerët e partive pas nënshkrimit të marrëveshjes deklaruan se këtë koalicion e lidhin për të mirën e vendit dhe për të çuar përpara proçeset integruese, pa treguar diçka më tepër.
Kryetari i PDK-së, Kadri Veseli, tha se ky koalicion është ndërtuar për punësimin e të rinjve dhe zhvillimin ekonomik. Ai shtoi se është çështje ditësh kur do të konstituohen institucionet, dhe kjo do të bëhet me konsulta ndërmjet të gjitha partive politike, duke përfshirë edhe Listën Rugova. Veseli u shpreh i bindur se nuk do të ketë vonesa.
Kandidati për kryeministër nga koalicioni PAN dhe AKR, Ramush Haradinaj tha se koalicioni me partinë e Pacollit i sjell Kosovës nisjen e nevojshme.
Haradinaj ka deklaruar se përgjegjësitë janë ndarë në bazë të vlerave, dhe se vonesat në krijimin e institucioneve kanë qenë shumë të rënda.
Kryetari i AKR-së, Behgjet Pacolli ka thënë se roli i koalicionit me PAN-in janë qytetarët dhe të rinjtë e Kosovës. Ai është shprehur i bindur se me këtë koalicion proceset do të shtyhen përpara.
Kurse kryetari i Nismës për Kosovën, Fatmir Limaj pas nënshkrimit të koalicionit me PAN u shpreh se nga ky moment Kosova e ka shumicën e konsolidura për formimin e institucioneve.
“Nga sot po bashkohet vullneti i qytetarëve të Kosovës. Me këtë koalicion Kosova ka shumicë të konsoliduar, dhe nga ky moment është fillimi i ndërtimit të institucioneve”, ka thënë Limaj. /tesheshi.com/
