Eshtë fillimi i një dite të re në kryeqytetin e Koresë së Veriut. Sapo agon, dritat e vetme të ndezura në rrugët e qendrës janë ato që ndriçojnë dy portrete gjigande të themeluesit të vendit, Kim Il Sung dhe djalit të tij, Kim Jong Il.
Pas pak, nis të shfaqet turma e heshtur e njerëzve që shkojnë në punë. Burra dhe gra veshur me kostume të errëta që zbresin drejt lagjes qendrore ku ndodhen selitë e ministrive qeveritare dhe zyrat.
Autobuzët janë transporti masiv më i përdorur në këtë pjesë të Penianit: të vjetër e të ndryshkur nga vitet 1960, ata bashkëjetojnë në rrugë me automjete fringo të reja. Brenda, pasagjerë të heshtur vështrojnë përmes dritareve të veshura me avull.
Në kryqëzimet kryesore, police trafiku kujdesen të pikasin makinat e rralla që udhëtojnë përmes rrugëve të Penianit. Ato përshëndesin në stilin ushtarak makinat që mbajnë targa qeveritare. Ngërçet e trafikut janë gjë e rrallë.
Në qendrën e qytetit, sheshi Kim Il Sung është vendndodhja më e njohur dhe më e dallueshme e këtij shteti komunist. Sheshi shërben për paradat ushtarake dhe këtu liderët e Koresë së Veriut brohoriten nga qindra mijë qytetarë të devotshëm gjatë festimeve shtetërore.
Koreja e Veriut përshkruhet shpesh si Mbretëria Eremite – një tokë ku shkelen të drejtat e njeriut, me kampe pune, uri dhe teprime të dinastisë familjare Kim.
Por, në kryeqytetin koreano-verior, menaxherët qeveritare kanë një anë tjetër që duan t’ua tregojnë gazetarëve, udhëtarëve dhe investitorëve – ajo që përmbledh modernizimin. Godinat e vjetra të ndërtuara në vitet 1980 po zëvendësohen me komplekse të larta banimi.
Telefonat celularë përdoren gjerësisht nga koreano-veriorët. Në një shkollë lokale të përzgjedhur për t’u vizituar, nxënësit recitojnë Hamletin në vend të Stalinit. “Ndërgjegja” e gjithëkohshme e qeverisë, ata që shoqërojnë vizitorët, të kujtojnë se këto ndryshime nuk janë reforma ndaj sistemit, por masa të reja për ta përmirësuar atë.
Fotografitë e mëposhtme të publikuara nga Al Jazeera tregojnë disa anë të jetës në Korenë e Veriut, që vetë autoritetet kanë lejuar të jenë të “dukshme”.
Përgatiti: Juli Prifti – /tesheshi.com/
