Greqia bëhet gati sot të votojë në parlament njohjen e Palestinës, me ç’rast nga dje gjendet në Athinë presidenti i Palestinës, Mahmud Abbas.
Kryeministri grek, Aleksis Cipras, do ta priste atë në një takim të posaçëm, ku nuk do i kursente fjalët mbështetëse për Palestinën e palestinezët.
Palestinezët po luftojnë për drejtësi, u shpreh mikpritësi grek. Zgjidhja e çështjes palestineze, sipas tij, është çelësi për zhvillimet paqësore në Lindjen e Mesme.
“Fatkeqësisht ne jetojmë në një kohë kur rajoni ynë është rrethuar nga zhvillime negative, nga një paqëndrueshmëri e madhe, nga luftëra, ndërhyrje, dhe nga shtimi i organizatave terroriste dhe i sulmeve terroriste,” vuri në dukje Cipras.
Ai do të bënte thirrje për një ndalim të menjëhershëm të zgjerimit të ngulimeve izraelite dhe për respektim të statukuosë historike të vendeve të shenjta.
Njëkohësisht, kryeministri i Greqisë do të bënte të ditur vendimin se të gjithë dokumentet publike greke do të përdornin këtej e tutje termin “Palestina”, e jo “Autoriteti palestinez”.
Greqia do t’u bashkohet atyre vendeve që e kanë njohur shtetin e Palestinës. /tesheshi.com/
