Të prekur nga moti i keq, me dëborë e ngrica, një numër rajonesh në Afganistan e Pakistan janë goditur dhe nga orteqet.
Siç lajmëron BBC-ja, më shumë se 106 persona kanë humbur jetën dhe dhjetëra të tjerë janë lënduar prej tyre dhe prej borës së dendur.
53 persona kanë vdekur në një fshat në Nuristan, një provincë në verilindje të Afganistanit, në kufi me Pakistanin. Rënia e ortekut qe shkaku i ngjarjes tragjike në këtë zonë të populluar.
Një zëdhënës i dikasterit afgan të katastrofave natyrore i deklaroi AFP-së se orteqet kishin groposur dy fshatra të tërë po në provincën e Nuristanit.
Në veri të Pakistan pati po ashtu 13 të vdekur nga orteku. Viktima ka patur dhe mes të mbeturve në makinë e të ngrirë nga i ftohti.
Aeroporti ndërkombëtar i Kabulit është mbyllur gjithashtu për shkak të dëborës dhe erërave të forta.
Raportimi i BBC-së përfundon me paralajmërimin e zyrtarëve vendorë në Afganistan e Pakistan për më shumë rënie orteqesh pas vijimit të stuhive të dëborës. /tesheshi.com/
