Deputeti nga radhët e PDSH-së, Orhan Ibrahimi, mendon se kriminelët nuk gjenden në rrugë dhe në burgje, por në parlamentin e Maqedonisë. Në një fjalim në seancën e parlamentit, ai deklaroi se kriminelët nga të gjitha partitë politike janë mbledhur në një vend, pra, pushtetarët e BDI-së dhe VMRO-së.
Në fjalën në foltoren e parlamentit ai kërkoi që ligji për amnisti të përfshijë edhe të burgosurit shqiptarë.
“Këtu nuk përfshihen kategoritë më të prekura, e ato kategori janë të dënuarit politikë. Për ta kuptuar më saktësisht situatën, se si mundohen dhe si procesohen, do t’i përmend disa raste, siç është rasti i Agim Belulit, i komandant Cakallës, rasti i Monstrës dhe i Sopotit. Janë dënuar me burg të përjetshëm shumë të pafajshëm shqiptarë nën qeverisjen me ministër drejtësie nga BDI-ja. Mund ta paramendoni, 80 videoregjistrime i ka pasur në dispozicion hetuesia në Maqedoni, dhe në asnjërën prej tyre nuk ka gjetur një dëshmi që të tregojë për fajësinë e të dënuarve në rastin Monstra. Kë do të mashtrojë Ali Ahmeti, që thërret institucionet ndërkombëtare që t’i hetojnë rastet? S’i vjen turp që 12 vjet udhëheqin me dikasterin e drejtësisë në dëm të shqiptarëve,” është shprehur më tej Ibrahimi. /tesheshi.com/
