Ndërkohë që transferimeve të verës po u vjen fundi, me limitin e kohës që po afrohet me shpejtësi, një numër i madh i skuadrave europiane po kërkojnë t’i shfrytëzojnë dhe momentet përfundimtare.
Në Angli, dy tranferimet më të fundit janë paralajmëruar prej kohësh. Arsenali ka mundur t’i bëjë lojtarë të tij dy emra të njohur në futbollin spanjoll, Shkodran Mustafi-n, mbrojtësin e Valencias, dhe Lucas Perez-in, sulmuesin e Deportivo la Korunjës. Transferimi i tyre është zyrtarizuar.
Një tjetër lëvizje e bujshme në Premier League është largimi për më së paku një sezon, në formën e huazimit, i portierit të përfaqësueses angleze. Joe Hart ka lënë Mançester Sitin për të mbrojtur gjatë këtij sezoni portën e Torinos në Serinë A italiane.
Tomas Rosicky, mesfushori 35-vjeçar çek, ka lënë Anglinë për t’u kthyer të luajë me Spartën e Pragës për dy sezonet e ardhshme, ashtu siç e parashikon dhe kontrata e nënshkruar.
Ndërsa në Premier League pritet të ketë gjithashtu një kthim të bujshëm. Mbrojtësi simpatik brazilian, David Luiz, mund të lërë papritmas PSG-në për t’u rikthyer te Çelsi.
Francezit Mamadou Sakho, i cili aktivizohet në radhët e Liverpulit, i është treguar dera nga klubi, duke i sugjeruar të gjejë një ekip tjetër në formë huazimi.
Në Spanjë, Barcelona ka qenë aktive, posaçërisht në marrjen e dhënien me Valencian.
Sulmuesi 23-vjeçar i Valencias, Paco Alcacer, ka nënshkruar një kontratë pesëvjeçare me klubin katalanas, si blerja më e fundit.
Ndërkaq, rrugën e kundër ka ndjekur Munir El Haddadi, që është huazuar nga Barcelona te Valencia. Huazimi është njëvjeçar, por Valencia mund ta blejë sezonin e ardhshëm.
Në Itali, Interi ka bërë të tijin brazilian e ashtuquajtur Gabigol. Gabriel Barbosa është vetëm 20 vjeç; ai ka nënshkruar një kontratë pesëvjeçare, dhe do të mbajë bluzën me numrin 10.
Napoli ka shtuar në radhët e tij një mesfushor të ri kroat. 21-vjeçar Marko Rog u bashkohet napolitanëve po ashtu me një kontratë pesëvjeçare.
Te Juventusi priten dy afrime në orët në vazhdim. Axel Witsel, mesfushori belg i Zenitit me gjasa do të jetë blerja e Juventusit, pasi ai ka lënë kampin stërvitor të Belgjikës për të kryer kontrollet mjekësore në Torino. Juan Cuadrado mund të luajë në të njëjtën kohë për kampionët e Italisë në këtë sezon, një lëvizje që mendohet të jetë në formë huazimi.
Skuadra gjermane e Shalkes ka huazuar për një vit nga Sevilja ukrainasin Yevhen Konoplyanka.
Wagner Love, sulmuesi brazilian që më herët ka luajtur për CSKA-në e Moskës, e ka lënë Monakon pas vetëm gjashtë muajsh për të kaluar në futbollin turk. Ai nënshkruan sot një kontratë dyvjeçare me skuadrën e Alanjasporit.
Në pikë të hallit, i papëlqyeshëm, pa qenë në gjendje të gjejë një klub me emër, Mario Balotelli mund të përfundojë sot te Nisa në Francë. Fillimisht mund të jetë një huazim që mund të shndërrohet në blerje. Sido që të ndodhë, Balotelli është i tepërt te Liverpuli, edhe pse është nën kontratë edhe për një vit me klubin anglez. /tesheshi.com/
