Mensur Krasniqi
Në kushte klimatike nën zero gradë Celsius, mbi 1500 refugjatë sirianë mbrëmë kanë qenë të detyruar të kalojnë natën pa asnjë lloj strehimi. Ata gjatë ditës së djeshme që nga ora 11:00 pasdite deri në mëngjesin e sotëm janë lënë jashtë Qendrës së Pranimit “Vinojug”- Gjevgjeli. Shkak i trajtimit johuman të refugjatëve është mbyllja e dy tendave të mëdha të montuara (për shkak të dezinfektimit të tyre), si dhe për shkak të bllokimit të hekurudhës nga ana e automjeteve taksi, në shenjë revolte nga vendimi i Komiteti për Menaxhim të Situatave të Krizave, që refugjatët të transportohen fillimisht me tren, ndërsa vetëm në raste të jashtëzakonshme me shfrytëzimin e taksi-automjeteve.
Avokati i Popullit konsideron se institucionet kompetente për përballjen me krizën e refugjatëve manifestojnë një sjellje skajshëm joserioze dhe neglizhencë për refugjatët të cilët mbi 24 orë qëndrojnë jashtë në kushte të pavolitshme klimatike.
Përmes një komunikate, Avokati i Popullit, rekomandon që urgjentisht të mundësohet transporti papengesë i të gjithë refugjatëve deri në Qendrën e Pranimit “Tabanovc”, me shfrytëzimin e të gjitha mjeteve transportuese dhe duke e respektuar të drejtën e zgjedhjes së mjetit transportues nga ana e refugjatëve.
Njëkohësisht, u bën apel ministrive kompetente, veçanërisht Komitetit për Menaxhim të Situatave të Krizave dhe Qendrës për Menaxhim me Kriza që urgjentisht dhe pa prolongim ta zgjidhin problemin me transportin si dhe të krijojnë kushte për qëndrim dhe trajtim human të personave në Gјevgjeli.
Së bashku me refugjatët sirianë, në kufirin greko-maqedonas, natën e ka kaluar edhe kryetari i organizatës joqeveritare “Legis”, Jasmin Rexhepi. Ai për portalin tesheshi.com përshkruan mënyrën e trajtimit të refugjatëve në këto ditë të ftohta dimri.
“Pas qëndrimit të tyre 24orësh në Gjevgjeli, ata definitivisht vazhduan udhëtimin e tyre në kufirin Maqedoni-Serbi. Ishte një natë e vështirë. Shumica e refugjatëve kanë fjetur jashtë në temperatura shumë të ftohta. Shpresoj që kur më nuk do të jem dëshmitarë i një trajtimi të tillë ku refugjatët brenda natës u neglizhuan nga të gjitha autoritetet. Ne duhet të jemi zëri i tyre. Nuk duhet të lejojmë që politika dhe fitimi të ndërhyjnë në njerëzimin dhe dinjitetin e refugjatëve”, deklaroi për tesheshi.com Jasmin Rexhepi. /tesheshi.com/
