Nga Shkëlzen Rrecaj
Sot në Kuvendin e Kosovës u zhvillua një debat i nxehtë lidhur me votimin e amendamentit i cili i hap rrugë formimit të Gjykatës Speciale.
Kreu i AAK’së në fjalën e tij para deputetëve ka thënë se Gjykata Speciale po krijohet vetëm për Kosovën e jo për Republikat tjera që kanë qenë të përfshira në luftën e ish-Jugosllavisë.
“Një Gjykatë e tillë për Kosovën terrin ia sjellë jo njerëzve që mund të jenë subjekt i saj” ka thënë ai.
Ai ka thënë se Kosova do ta trajtohet si monstrum në arenën ndërkombëtare. Ai ka thënë se gjithë kjo do të zgjasë më shumë se 10 vjet.
Në fjalën e tij kryetari i NISMA për Kosovën, Fatmir Limaj, tha se me atë çka po i kërkohet sot, për ta votuar Gjykatën Speciale, asnjëherë nuk është sfiduar më shumë sesa që po sfidohet tani.
Ai ka kritikuar deputetët tjerë të cilët gjatë fjalimit të tyre folën për dhunën dhe masakrat që janë bërë gjatë luftës në Kosovë, e sërish deklaruan pro votimit për Gjykatën Speciale.
Deputeti Limaj ka mbështetur fjalimin e kolegut opozitar, Glauk Konjufcën duke thënë se është mirë që të gjithë ta rikujtojnë edhe njëherë fjalimin e tij, sepse ai i sqaroi më së miri çështjet nëpër të cilat ka kaluar Kosova.
“Unë ju kisha preferuar ta ktheni edhe njëherë fjalimin e kolegut tonë, Glaukut. Krejt çka flasim është përmbledhja e asaj çka tha ai. Ne jemi deputetë të këtij Parlamenti dhe kemi përgjegjësi për vendimet që do të na ndjekin tërë jetën. Po me kë do të ballafaqohemi sa ta kemi jetën? Asnjëherë nuk do të sfidohet Parlamenti i Kosovës si po sfidohet sot. Me i nxjerrë armiqtë ndërkombëtarë para vetes duke u fshehur mbrapa tyre, është hipokrizi. Secili duhet të vendosë për vete, por arsyetimet duhet t`i lëmë më një anë”, ka thënë Limaj.
Ndërsa i pari i Vetëvendosjes Visar Ymeri, pyeti se pse policët e njësive speciale po qëndrojnë përreth Kuvendit dhe a janë ata në mbrojtje të deputetëve apo në kundërshtim të veteranëve të luftës të cilët po protestojnë kundër themelimit ë Gjykatës Kushtetuese në afërsi të Kuvendit.
Ai themelimin Gjykatës Speciale e quajti atentat ndaj Kushtetutës së Kosovës dhe në kundërshtim me të drejtën ndërkombëtare.
Gjykata Speciale, sipas tij, është dëshmi ajo që Serbia e ka thënë se “ne nuk dimë të bëjmë shtet”, tha z. Ymeri
Kurse deputeti i Vetëvendosjes, Rexhep Selimi, ka thënë se me Gjykatën Speciale nuk po lëndohet vetëm UÇK-ja, por po lëndohet lufta e shenjtë dhe e ardhmja e shtetit tonë.
Ai më tej deklaroi se kundërshtimi ynë për një gjykatë të tillë nuk është kundërshtim ndaj drejtësisë, por ndaj padrejtësisë.
“Kjo gjykatë po tenton t’ia ngarkoj shqiptarëve pastrimin etnik, a kemi bërë spastrim etnik. Duhet të kemi trimëri jo për ta shtrirë kokën, por për të kundërshtuar padrejtësitë”, u shpreh Selimi.
I zëshëm ka qenë edhe deputeti i Nismës për Kosovën, Zafir Berisha, i cili tha se jemi para një momenti që të vulosim tradhtinë e luftës së UÇK-së.
Ai dha edhe një porosi për dy ish-pjesëtarët e UÇK-së: Azem Syla, nëse sot votoni gjykatën nuk do të jeni më “Daja” i luftës, as t’i Xhavit Haliti, s’do të jesh më “Zeka”, deklaroi ai. /tesheshi.com/
