Nga Blendi Gashi
Qeveria e Kosovës ka kërkuar nga institucionet e sigurisë shtimin e masave, në mënyrë që siç ka thënë, Kosova të jetë e përgatitur në të gjitha aspektet që të përballet me kërcënimet e terrorizmit. Më konkretisht, së bashku me autoritetet policore, kabineti Mustafa, nga këto dy domene pushteti u është bërë thirrje qytetarëve që “të rrisin vigjilencën dhe të shmangin, kurdo që kanë mundësi, sidomos vendet shumë të frekuentuara, siç janë koncertet, ndeshjet sportive, klubet e natës, stacionet e autobusëve apo qendrat tregtare dhe të mos hezitojnë të lajmërojnë për çdo shqetësim.”
Ministri i Punëve të Brendshme, Skënder Hyseni, në një emision televiziv ka theksuar se edhe Kosova sikurse edhe shumë shtete të tjera po merr masa për t’u mbrojtur nga sulmet eventuale terroriste.
“Pas një konsultimi paraprak më Këshillin Kombëtar të Sigurisë, është vlerësuar se duhet të shtohen masat, dhe të shtohet vigjilenca dhe kujdesi te qytetarët veç e veç. Do të ketë përkujdesje më të madhe nëpër tubime të ndryshme. Cak i sulmeve të terroristëve kryesisht janë vendet ku ka shumë frekuentim të njerëzve. Megjithatë nuk ka nevojë për panik, sepse nuk ka ndonjë kërcënim konkret”, ka deklaruar Hyseni.
Por ky paralajmërim i pushtetit vjen vetëm pak ditë para mbatjes së protestës së paralajmëruar nga opozita, më 28 nëntor, për të kundërshtuar Zajednicën dhe Demarkacionin.
Dhe sipas opozitës, qeveria nuk e ka hallin e terrorizmit, por po e luan djallëzisht këtë kartë për të penguar marshin opozitar të 28 nëntorit.
Sepse për dallim nga shteti i Kosovës, thotë opozita, kryeministri Edi Rama ka dhënë një mesazh të sigurt se nuk ka vend për panik dhe se jeta duhet të vazhdojë normalisht.
Zëdhënësi i AAK-së, Muharrem Nitaj, ka një apel për pushtetin, siç thotë të mos lëshojnë tollumbace alarmi sepse tubimi i 28 nëntorit do të jetë paqësor.
“Ne do të jemi paqësor, dhe tubimi ynë nuk do ta rrezikojë sigurinë e askujt. Policia e Kosovës le ta kryej e qetë punën e saj. Manifestimi ynë ku do të marrin pjesë i madh e i vogël, nuk mund të lidhet me asgjë, përpos me një kundërshtim qytetar, për dy marrëveshjet, të cilat tashmë po i kundërshton shumica”, ka deklaruar Nitaj për tesheshi.com.
Lideri i Lëvizjes Vetëvendosje, Visar Ymeri, nëpërmjet një postimi në Facebook ka shkruar se Isa Mustafa e Hashim Thaçi, përmes Skënder Hysenit, janë duke e terrorizuar Prishtinën.
Ymeri ka vlerësuar se në një kohë kur liderët evropianë i bëjnë thirrje njerëzve të mos kenë frikë dhe të vazhdojnë aktivitetet e tyre të përhershme ekonomike, sociale, kulturore e politike – liderët tanë shfrytëzojnë çdo rast për të mbjellë panik, sepse duan ta përdorin frikën për të shtypur demokracinë e për të pezulluar aktivitetin opozitar.
“T’u tregojmë më 28 Nëntor që këto politika frikësimi e shantazhi nuk kanë sukses. T’u tregojmë që nuk lejojmë të na shkatërrohet vendi e përdhoset dinjiteti. T‘u tregojmë se jemi kundër këtyre marrëveshjeve, se këto marrëveshje nuk do të zbatohen. T’u tregojmë se nuk jemi as vartës, as klientë, e as vegla të tyre. T’u tregojmë se jemi qytetarë të lirë”, ka shkruar Ymeri.
Deputeti i AAK-së, Pal Lekaj ka thënë se kërkesa e kryeministrit për rritjen e sigurisë është tentim i qeverisë për të ndaluar marshimin paqësor të opozitës që e ka paralajmëruar me 28 nëntor. Lekaj ka thënë se pavarësisht këtyre, opozita mbetet e vendosur për ta organizuar këtë marsh dhe nuk do të ketë asgjë që do të ndalë. Ai është shprehur se kryeministri e ka bërë këtë qëllimisht për t’i frikësuar qytetarët për t’iu bashkuar marshit.
Kreu i Prishtinës, Shpend Ahmeti, ka thënë se është me rëndësi që me datën 28 nëntor të ketë një manifestim paqësor.
“Këto ditë po tentohet që të krijohet frikë e panik te qytetarët me arrestime e storie konspirative”, ka thënë Ahmeti.
/tesheshi.com/
