Lëvizja Vetëvendosje ka iniciuar formimin e një komisioni parlamentar për hetimin e transmetuesit publik (RTK), në një kohë kur akuzat e këtij subjekti politik ndaj këtij transmetuesi për “kapje nga pushteti” janë bërë të përditshme.
Inicimin e këtij komisioni e ka përmendur sot në mbledhjen e kryesisë së Kuvendit, deputetja e VV-së, Albulena Haxhiu.
“Kemi bërë kërkesë për krijimin e komisionit hetimor për RTK-në… PDK e LDK nuk kanë propozuar emra për këtë komision”, tha Haxhiu.
Sipas saj, dy partitë opozitare AAK dhe NISMA janë pajtuar për këtë hetim dhe i kanë sjellë emrat e anëtarëve të komisionit.
Akuzat e VV-së ndaj RTK-së kanë kulmuar disa javë më parë kur RTK e anuloi një intervistë të aranzhuar me kryetarin e Lëvizjes Vetëvendosje, Visar Ymeri.
Që nga ajo ditë, VV vazhdimisht kërkon realizimin e kësaj interviste, madje edhe përmes protestave dhe konferencave të shtypit.
Kryetari i Kuvendit, Kadri Veseli, pas përfundimit të mbledhjes së kryesisë nuk e komentoi drejtpërdrejt kërkesën për hetim ndaj RTK-së kur u pyet për akuzat e VV-së për “kapje të RTK-së”.
“Mediat duhet të jenë sa më të lira e më të pavarura, dhe mendoj që këtë janë duke e bërë. Nëse ka presion kjo është e papranueshme. Nuk është mirë që gazetarëve t’u sulmohen fëmijët e tyre me bomba, e nuk është mirë qe ata të kërcënohen” tha Veseli duke iu referuar një sulmi me bombë muajin e kaluar ndaj shtëpisë së drejtorit të përgjithshëm të RTK-së, mentor Shala.
Ndryshe, menaxhmenti i RTK-së në vijimësi ka mohuar akuzat e bëra nga VV duke thënë se televizioni publik është i hapur për të gjitha partitë politike. /tesheshi.com/
