Nga Blendi Gashi
Kryetarët e partive të opozitës, Visar Ymeri (VV), Ramush Haradinaj (AAK) dhe Fatmir Limaj (NISMA) më 20 tetor të vitit 2015-të në një prej takimeve që zhvilluan me tashmë ish-Presidenten Atifete Jahjaga, deklaruan se nuk do të ulen në një tryezë me përfaqësuesit e pozitës, deri sa të tërhiqet marrëveshja për asociacionin e komunave serbe dhe ajo e demarkacionit me Malin e Zi.
Por, shtatë muaj më vonë opozitarët kosovarë, të cilët tashmë kanë ndarë rrugët dhe nuk janë unik kundër qeverisë “Mustafa”, i kanë ngrënë fjalët e tyre dhe njëherësh janë dorëzuar, pasi u ulën në një tryezë me Kryeministrin Isa Mustafa dhe kryekuvendarin Kadri Veseli.
Atë që nuk arriti ta bëjë ish-Presidentja Atifete Jahjaga për më shumë se gjysmë viti, e bëri komisioneri për Zgjerim i Bashkimit Evropian, Johannes Hanh, i cili qëndroi dje në Prishtinë për të marrë pjesë në inaugurimin e marrëveshjes së Stabilizim Asociimit (MSA) me Kosovën, që njëkohësisht është marrëveshja e parë kontraktuale ndërmjet Kosovës dhe BE-së.
Komisioneri Hahn padyshim që është fajtori kryesorë për bashkimin e liderëve politik kosovarë pas një kohe tejet të gjatë acarimesh e fyerjesh mes tyre.
Pranë njëri-tjetrit dje u ulën Isa Mustafa, Visar Ymeri, Kadri Veseli e Jakup Krasniqi, ky i fundit në vend të Fatmir Limajt e ende nuk dihet arsyeja pse kreu i NISMA-s nuk ishte prezent në takim.
Komisioneri Hahn i uli gjakrat mes liderëve të pozitës dhe opozitës të paktën për momentin pasi paralajmërimet janë se Kuvendi i Kosovës sërish mund të mbulohet nga tymi i gazit lotsjellës dhe një gjë e tillë mund të ndodhë kur ratifikimi i Demarkacionit me Malin e Zi të vijë në Parlament.
Për çudi liderët kosovarë u takuan në një sallë të Kuvendit që as vetë nuk mund ta kenë paramenduar. Pikërisht në sallën alternative të Parlamentit, aty ku mbaheshin seancat pasi opozita nuk lejonte mbajtjen në sallën kryesore.
Megjithatë, duhet theksuar se edhe Hahn arriti t’i ulë së bashku në një tavolinë, duket se nuk ka arritur rezultatin final që është bindja e partive opozitare për të mos penguar ratifikimin e marrëveshjes për demarkacionin me Malin e Zi si dhe themelimin e Asociacionit të Komunave me shumicë serbe.
Opozita kosovare edhe pse e ndarë vazhdon të jetë unike sa i përket kundërshtimit të këtyre marrëveshjeve, por jo edhe sa i përket organizimit të protestave kundër qeverisë aktuale.
Visari edhe muajin e kaluar u ulë në tryezë me Mustafën e Veselin, por jo edhe Limaj
Lideri i Lëvizjes Vetëvendosje, Visar Ymeri, edhe me date 21 prill pranoi të ulet në një tavolinë të përbashkët me udhëheqësit e dy partive që drejtojnë koalicionin qeverisës, Isa Mustafën dhe Kadri Veseli.
Bashkë i bëri një tryezë diskutimi e organizuar nga shoqëria civile, konkretisht nga Grupi për Studime Juridike dhe Politike (GJSP) dhe Instituti i Prishtinës për Studime Politike (PIPS) me temë “Si ta shndërrojmë MSA-në në një proces për reforma thelbësore në Republikën e Kosovës?”.
Në dallim nga VV që u përfaqësua nga kryetari i saj, dy partitë tjera opozitare AAK dhe NISMA në këtë takim u përfaqësua në nivel më të ulët të hierarkisë partiake, me Ardian Gjinin, përkatësisht Jakup Krasniqin.
Duke parë këto takime mund të konkludohet se deri më tani fjalën e ka mbajtur veç kreu i NISMA-s Fatmir Limaj pasi ende nuk është ulur në një tryezë me Mustafën e Veselin, por ka deleguar numrin dy të partisë Jakup Krasniqin. /tesheshi.com/
