Pas bllokimit të seancës së sotme dhe të punës së Kuvendit nga tri partitë opozitare, këto të fundit kanë lëshuar një deklaratë të përbashkët, me dy kërkesa për Qeverinë dhe Kuvendin.
Opozita parashtron në deklaratë kërkesën që të mos thirret më seancë plenare, sepse, sipas tyre, mund të ketë përshkallëzim të situatës, si dhe kërkesën për tërheqje nga marrëveshjet me Serbinë dhe atë për demarkacion me Malin e Zi. “Vetëm tërheqja nga këto marrëveshje do ta kthejë normalitetin institucional dhe shoqëror në Kosovë,” thuhet në deklaratën e tri partive opozitare.
DEKLARATË E OPOZITËS SË BASHKUAR
Ne jemi të vendosur në protestën tonë kundër marrëveshjeve me Serbinë dhe asaj për demarkacionin me Malin e Zi. Qeveria e Republikës me marrëveshjet në fjalë ka krijuar situate të jashtëzakonshme. Kuvendi nuk mund të vazhdojë sikur zakonisht. Protesta jonë në Kuvend nuk do të ndalet dhe nuk do të lejojmë normalizimin e ‘Zajednicës’ dhe faljen e tokave të Kosovës Malit të Zi.
- Kërkojmë nga Kryesia e Kuvendit që të mos thërras më seancë plenare. Çfarëdo insistimi në këtë drejtim është provokim dhe përshkallëzim i situates në Republikën e Kosovës.
- Kërkojmë nga Qeveria e Republikës së Kosovës që të merr vendim për tërheqje nga Marrëveshjet me Serbinë dhe atë për demarkacion me Malin e Zi. Vetëm tërheqja nga këto marrëveshje do ta kthejë normalitetin institucional dhe shoqëror në Kosovë.
Prishtinë,
15 tetor 2015
/tesheshi.com/
