Gjatë seancës së sotme të Kuvendit të Kosovës, opozita ka kritikuar të parin e qeverisë me arsyen se ai po e injoron kërkesën e tyre për interpelancë për të diskutuar rreth drejtësisë në vend dhe me të vetmen kërkesë dorëheqjen e ministrit Hajredin Kuçi.
Megjithatë, kryesuesi i kuvendit e ka renditur si pikë të fundit të rendit të ditës, interpelancën me kryeministrin edhe pse ai nuk ka konfirmuar ende pjesëmarrjen.
Ndërsa deputetja nga AAK-ja, Donika Kadaj-Bujupi tha se “nuk do të flasin me murin” por duan që kryeministri të jetë i pranishëm gjatë interpelancës. Ajo ka akuzuar kryeministrin e Kosovës, Isa Mustafa se nuk po i përgjigjet interpelancës, e cila sipas saj do të duhej të mbahej që sot.
Po ashtu ajo theksoi se kjo ishte kërkesë e tri partive opozitare. Znj. Kadaj-Bujupi tha se Mustafa gjatë fushatës ka folur për respektimin e ligjit, por në momentin që ikë nga deputetët, kjo sipas saj tregon se ai ka gënjyer votuesit dhe të gjithë qytetarët e Kosovës.
Ajo tha se kuvendi duhet të merret me këtë çështje pasi Mustafa ka për obligim t’i përgjigjet deputetëve.
I menjëhershëm ka qenë reagimi i deputetit të LDK-së, Ismet Beqiri, i cili tha se nuk janë kundër futjes së rendit të ditës dhe nëse kjo futet në rend të ditës kryeministri do të jetë këtu./tesheshi.com/
