Partitë opozitare, AAK, Vetëvendosje dhe Nisma dorëzuan në Gjykatën Kushtetuese ankimimin e tyre në lidhje me shkelje të Kushtetutës në rastin e procedimit në Kuvend për herë të dytë të amendamenteve që i hapin rrugën themelimit të Gjykatës Speciale. Tre përfaqësueset e partive opozitare, thanë se presin që Gjykata Kushtetuese të shfuqizojë amendamentin që sipas tyre, “suspendon Kushtetutën”.
Deputetja e Vetëvendosjes, Albulena Haxhiu tha se Qeveria duhej të reflektonte dhe ta merrte për bazë vendimin e 26 Qershorit. “Kem kërkuar që ky amendament të shfuqizohet. Presim që Kushtetuesja të marrë një vendim të duhur”, ka thënë Haxhiu.
Teuta Haxhiu nga AAK theksoi se Gjykata Speciale e ka humbur kredibilitetin dhe janë shkelur procedurat. Ajo përsëriti argumentet politike të seancës së miratimit të amendamenteve, duke vënë në dukje se deputetët nga presioni kanë ndryshuar qëndrim për Specialen.
Ndërsa Valdete Bajrami nga Nisma theksoi se pritet reflektim nga Kushtetuesja që të mos procedohen më tej amendamentet.
Dërgimi në Gjykatën Kushtetuese i amendamenteve është “rezistenca” e fundit e Opozitës, pasi është edhe hapi i fundit ligjor që mund të ndërmerret kundër procedimit të amendamenteve. Në momentin e një vendimi të Kushtetueses kundër kërkesës së Opozitës, pritet vetëm nënshkrimi nga presidentja Jahjaga. /tesheshi.com/
