Nga Bekim Laçi
Një reagim i Lëvizjes Besa e cila hapi dyert për “kryeshëndoshë” për Marrëveshjen e Ohrit, solli një reagim të BDI-së kundër kësaj force të re politike shqiptare në Maqedoni.
Ishtë një metaforë me të cilën ajo e shpalli të vdekur dokumentin në fjalë, gjë që detyroi BDI-në në pushtet që ta quajë “Besën” parti infantile duke i dhënë edhe epitete tjera ofenduese, që njëherit shënon dhe përplasjen e parë serioze mes këtyre dy subjekteve politike.
Lëvizja Besa është relativisht e re në skenën politike, por zhvillimi më i fundit dëshmon për etablimin e saj në politikëbërje.
Njohësit e zhvillimeve politike, thonë për portalin tesheshi.com se BDI shquhet si parti që deri më tani ka përdorur diskurs të matur politik dhe publik, pa fyerje ndaj oponentëve politikë, por që ka ndryshuar qasjen.
Analisti Sefer Tahiri, thotë se kohëve të fundit tek BDI vërehen reagime, të cilat kanë tone jotolerance ndaj kritikave, duke përdorur fjalor fyes dhe duke akuzuar për infantilizëm apo papjekuri subjekte të caktuara politike, vetëm pse kërkojnë marrëveshje të re politike: “Kjo mund të jetë për dy arsye. E para, kjo vjen si pasojë e mospasjes së kapacietit demokratik tek hartuesit e komunikatave, që flasin për kurs të ri të marrëdhënieve me publikun; dhe e dyta mund te jetë frika nga zënia e hapësirës politike dhe elektorale nga subjektet e reja politike, që BDI ka dëshirë t`i quajë të vogla”, shprehet Tahiri.
Politikologu Xhenis Sulimani, për portalin tesheshi.com shprehet se paraqitja e subjekteve të reja politike siduket ka krijuar nervozizëm tek partia më e madhe shqiptare, BDI. Kur mbarojnë argumentet arma më e fort e atyre që humbin betejën janë ofendimet, thotë ai: “Kjo dëshmohet edhe në prononcimet e fundit të BDI-së kur quajnë infantile gjithë ato të cilët kanë mendime të kundërta me subjektin e tyre. Por edhe mënyra se si megafonët e tyre mediatik, sulmojnë opozitën, sidomos Lëvizjen Besa së fundmi. Andaj shtrohet pyetja, pse në çaste kur nisen të hapen çështje të ndryshme, kërkohet përgjegjësi, partia në pushtet nënvlerëson oponentët. Ky është sinjal se BDI po i frikësohet konkurrencës”, thotë Sulimani.
Ndryshe, bashkë me epitetin infantil, BDI akuzoi “Besën” se me shpalljen për të vdekur Marëveshjen e Ohrit ajo po varrosë flamurin, gjuhën, USHT, mbi 20.000 administratorë si dhe garancën e SHBA-ve, BE-së, dhe NATO-s, në të cilën u kundërpërgjigj njëri nga ideologët e Lëvizjes, Zeqirija Ibrahimi, i cili partinë shqiptare në pushtet e quajti inferiore karshi asaj maqedonase VMRO-DPMNE:
“Inferioritet është që universitetin e vetëm shqip në Maqedoni ta shkatërrosh, duke e bërë shtab partiak dhe duke e vendosur në grupin e universiteteve më të dobëta në botë.
Inferioritet është që komunat shqiptare të jenë komunat më të pazhvilluara në Maqedoni, po edhe më gjerë.
Inferioritet është që administratorët shqiptarë të skllavërohen si ushtarë partie e si mbledhës votash, shumë prej tyre të poshtërohen duke mos u avancuar më shumë se dhjetë vite,
Inferioritet është që ish ushtarët e UÇK-së të mos e kenë marrë statusin e tyre të merituar as pas 14 viteve, ndonëse Marrëveshja e Ohrit e kishte rregulluar edhe këtë”, shkruan mes tjerash Ibrahimi. /tesheshi.com/
