Dy shtetas, shqiptar dhe italian, u arrestuan nga policia pas një aksioni në det të hapur, që u finalizua me sekuestrimin e rreth 1 ton kanabisi.
Aksioni po vijon ende të zhvillohet në det dhe tokë, në bashkëpunim të autoriteteve shqiptare dhe italiane. Policia e Shtetit informon zyrtarisht se operacioni nisi pas sinjalizimit të radarit të Policisë Kufitare në Hoxharë.
“Midis Plazhit të Levanit dhe Darëzezës u bllokua një velierë me emrin “Nano Nini” me flamur italian me 2 persona në bord, një italian dhe një shqiptar. Skafistët kanë hedhur lëndën narkotike në det”, shprehen burimet.
Policia thotë se efektivët janë në terren për të rikuperuar lëndën narkotike. Deri tani rreth 90 pako të mëdha janë sekuestruar nga ana e Policisë.
Skafistët janë shoqëruar në Polici për veprime të mëtejshme.
Operacioni nisi në mesnatë nga Policia Kufitare Vlorë, Delta Force, Roja Bregdetare, Guarda di Finanza italiane, si dhe Policia e Vlorës dhe Forcat e Ndërhyrjes së Shpejtë të Fierit. /tesheshi.com/
