Prodhuesi zviceran i orëve luksoze Omega thotë se ishte viktimë e “veprimtarisë së organizuar kriminale”, pasi tre ish-punonjës pranuan se kishin shitur një orë false Speedmaster për rreth 3.4 milionë dollarë.
Ora u ble nga Omega për 3.11 milionë franga zvicerane – 25 herë më shumë se çmimi i sipërm i vlerësuar i ankandit – në ankandin “Philips” në Gjenevë në nëntor 2021.
Kompania Omega tha në një deklaratë për CNN se ata synonin ta shfaqnin orën në muzeun e tyre në Bienne, Zvicër dhe individët në krye të kompanisë besonin se ishte një “orë e rrallë dhe e jashtëzakonshme që absolutisht duhej të ishte pjesë koleksioneve të ekspozitës së Omega-s”.
Besohej se ishte një orë dore kronografike prej çeliku inox e vitit 1957, e përshkruar nga shtëpia e ankandit Phillips si një nga “modelet e para – më të vlefshme – speedmaster”.
Megjithatë, më vonë u zbulua se ora, e cila ishte blerë përmes një “ndërmjetësi”, ishte në fakt një orë Frankenstein – një orë joautentike e përbërë nga “komponentët kryesisht autentikë të Omega-s”, tha Giovanni Alegre, menaxher i lartë i komunikimit të Omega-s, siç u konfirmua për CNN në një deklaratë.
“Omega dhe Philips ishin viktima të krimit të organizuar që ishte përfshirë në shitjen e kësaj ore në ankand”, thuhet në deklaratë. /tesheshi.com/
