Këshilli i Sigurimit i OKB-së ka miratuar njëzëri një rezolutë që i bën akoma më të ashpra sanksionet kundër Koresë së Veriut. Ato synojnë t’i detyrojnë autoritetet koreanoveriore t’i ndalojnë programet bërthamore dhe të raketave balistike.
Rezoluta e miratuar thotë mes të tjerash: “Këshilli i Sigurimit i OKB-së ripohon vendimin e tij që [Koreja e Veriut] të heqë dorë nga të gjitha armët bërthamore dhe programet bërthamore ekzistuese në një mënyrë të plotë, të verifikueshme dhe të pakthyeshme.”
Dokumenti i miratuar kërkon kontrollimin e të gjitha ngarkesave të Koresë së Veriut dhe ndalon eksportin që andej të mineraleve të caktuara.
Po ashtu u kërkohet vendeve anëtare ta ndalojnë Korenë e Veriut të hapë dhe të mbyllë banka të bashkëshoqëruara me programet bërthamore dhe raketore. Ndalohet plotësisht në të njëjtën kohë dhe shitja e armëve konvencionale që mund të ndihmojnë në forcimin e ushtrisë së Koresë së Veriut. Rezoluta përmban dhe sanksione të tjera.
Presidenti amerikan e ka përshëndetur menjëherë rezolutën, duke thënë: “Sot bashkësia ndërkombëtare, duke folur me një zë, i ka dërguar Phenianit një mesazh të thjeshtë: Koreja e Veriut duhet t’i braktisë menjëherë këto programe të rrezikshme dhe të zgjedhë një udhë më të mirë për popullin e vet.”
Ndërsa ambasadorja amerikane në OKB, Samantha Power, i ka kujtuar Këshillit të Sigurimit se Koreja e Veriut ishte i vetmi vend që kryente një provë bërthamore në shekullin e 21-të. /tesheshi.com/
