Në një votim të Këshillit të Sigurimit të OKB-së për të aprovuar një rezolutë të re kundër trafikimit, që do ta lejojë BE-në t’i kapë mjetet lundruese të trafikantëve të njerëzve në Mesdhe, 14 prej anëtarëve kanë qenë në favor të saj, ndërsa vetëm Venezuela abstenoi.
Rezoluta do të jetë e vlefshme për një vit dhe do t’i lejojë anijet luftarake të BE-së t’i kërkojnë dhe t’i kapin mjetet lundruese që bartin emigrantë drejt brigjeve europiane. Përdorimi i forcës u autorizua nën kapitullin 7 të Kartës së Kombeve të Bashkuara.
Ndërkaq, vetë emigrantët do të merren dhe “do të trajtohen me njerëzi dhe dinjitet” përpara se të transportohen për në Europë, ku mund të kërkojnë azil.
Ambasadori britanik në OKB, Matthew Rycroft, do të deklaronte në lidhje me rezolutën: “Aksioni kundër trafikantëve në det nuk do të zgjidhë vetëm këtë krizë, por ka për të dërguar mesazhin se njerëzit nuk mund të përfitojnë nga kjo tregti e mbrapshtë pa u hyrë ferrë në këmbë. Ajo do të shpëtojë jetë.”
Ndërsa ambasadori i Venezuelës i ka akuzuar autorët e rezolutës për trajtim të problemit në një mënyrë të gabuar, duke u përqendruar te zgjidhjet ushtarake të krizës, e jo te ato humanitare. Rafael Ramirez e përshkroi kështu qëndrimin e vendit të tij: “Ky problem serioz nuk mund të zgjidhet me ngritje muresh apo me ndërmarrje aksionesh ushtarake.”
Sipas Organizatës Ndërkombëtare për Emigracionin, në përpjekjet për të lënë Afrikën e Veriut dhe për të kapërcyer Mesdheun kanë gjetur vdekjen më tepër se 2.600 njerëz vetëm gjatë këtij viti, kurse 550.000 të tjerë kanë arritur të gjallë në brigjet europiane. /tesheshi.com/
