Pasi ndihmat për popullsinë siriane arritën në pesë rajone, OKB-ja synon që brenda hapësirës kohore të një jave këto ndihma të arrijnë në të 18 zonat e rrethuara në Siri.
Ka deklaruar kështu Jan Egeland, këshilltari i posaçëm i të dërguarit të OKB-së në Siri, Staffan de Mistura, pas një takimi të përfaqësuesve të Grupit Ndërkombëtar të Mbështetjes për Sirinë.
Ai njoftoi se misioni i përmbushur i dërgimit të ndihmave në pesë zona të rrethuara u krye nga 114 kamionë, që kishin në to furnizime për 80.000 njerëz.
“Diskutuam fazën tjetër, që është ajo e arritjes në të tëra zonat e tjera të rrethuara të Sirisë. Dhe ne duhet të jemi në gjendje të bëjmë kështu para takimit të ardhshëm, që do të jetë pas një jave,” u shpreh Egeland.
OKB-ja çmon se ka më shumë se 480.000 sirianë që jetojnë në zona të rrethuara nga qeveria, rebelët apo forcat terroriste.
Më tepër se katër milionë të tjerë jetojnë në zona të vështira për t’u arritur, sipas përkufizimit të OKB-së. /tesheshi.com/
