Vendet e BE-së duhet të pranojnë deri në 200 mijë refugjatë si pjesë e “strategjisë së përbashkët” për të zëvendësuar qasjen e copëzuar ndaj krizës së emigrantëve. Apeli vjen nga Kombet e Bashkuara.
Shefi i agjencisë së OKB për refugjatët, Antonio Guterres theksoi se Bashkimi Europian duhet të mobilizojë të gjitha forcat për krizën, pasi momenti është vendimtar.
Liderët e BE-së, të ndarë për mbajtjen e barrës së refugjatëve, po përpiqen të gjejnë një zgjidhje të përbashkët në disa takime që po mbahen këtë të premte.
E ndërsa kriza përshkallëzohet, BE përballet me presion në rritje për të miratuar politika kohezive në lidhje me fluksin e refugjatëve, më i madhi që prej Luftës së Dytë Botërore.
Komisioneri Guterres kritikoi qëndrimin e bllokut, që e cilësoi të pabalancuar dhe jofunksional prej të cilit kanë përfituar, tha ai, vetëm trafikantët e qënieve njerëzore.
Ai apeloi BE-në të pranojë 200 mijë refugjatë si pjesë e një programi rialokimi masiv që duhet të ketë pjesëmarrjen e detyrueshme të të gjitha shteteve anëtare./tesheshi.com/
