Presidenti amerikan u premtoi vendeve të Gjirit Persik se SHBA-të do të vihen në mbrojtje të tyre ndaj çdo sulmi të jashtëm.
Obama i siguroi ditën e djeshme këto vende për angazhimin e SHBA-ve në dhënien e ndihmës për mbrojtjen e sigurisë së tyre, duke përfshirë dhe përdorimin e mundshëm të forcës ushtarake.
Ai bëri të ditur se nënshkrimi i një marrëveshje përfundimtare me Iranin do ta ndërpriste rrugën e republikës islame drejt një arme bërthamore, e se nuk do t’i linte më të pambrojtura vendet e Këshillit të Bashkëpunimit të Gjirit.
Takimi mes zyrtarëve të vendeve të Gjirit Persik dhe Obamës u zhvillua në Kemp Dejvid, në Meriland. Vetëm dy prej gjashtë kryetarëve të shteteve morën pjesë në takim, posaçërisht emirët e Kuvajtit dhe Katarit, ndërsa Arabia Saudite, Emiratet e Bashkuara Arabe, Bahrejni dhe Omani u përfaqësuan me zyrtarë të nivelit më të ulët.
Më e spikatshme ishte mungesa e mbretit saudit, i cili e anuloi vizitën pasi më herët e kishte pranuar ftesën e Shtëpisë së Bardhë.
Një pjesë të mirë të axhendës së takimit të djeshëm e zunë diskutimet mbi Iranin.
Obama pohoi se SHBA-të qenë dakort për një bashkëpunim më të madh në fushën e sigurisë me vendet e Gjirit Persik për t’i neutralizuar “aktivitetet destabilizuese” të Iranit në rajon.
Në diskutimet në Kemp Dejvid iu la hapësirë dhe konflikteve rajonale, si dhe luftës ndaj ISIS-it. /tesheshi.com/
