Presidenti amerikan i është drejtuar të dielën popullit amerikan me një fjalim nga Shtëpia e Bardhë, temë kryesore e të cilit ka qenë terrorizmi, ISIS-i, besimi në shpartallimin e tij, si dhe një thirrje për bashkim kundër kësaj të keqeje.
Fillimisht Barack Obama iu referua vrasjeve në San Bernardino, në Kaliforni. “14 amerikanë u vranë të mërkurën… Ata u morën nga familja dhe nga miqtë që i deshën shumë. Ata ishin të bardhë dhe të zinj, latinë dhe aziatikë, emigrantë dhe të lindur amerikanë, nëna dhe baballarë, bija dhe bij. Të gjithë ata ishin pjesë e familjes tonë amerikane.”
“Sonte dua të flas me ju për këtë tragjedi, për kërcënimin më të gjerë të terrorizmit, dhe për mënyrën se si mund ta mbajmë vendin tonë të sigurt.”
Ai ka sqaruar se, “nuk kemi dëshmi se vrasësit u drejtuan nga një organizatë terroriste, …por është e qartë se të dy ata kishin hyrë në udhën e errët të radikalizimit, duke përqafuar një interpretim të shtrembëruar të Islamit…”
Më tej Obama e ka përgjithësuar çështjen, duke folur për terrorizmin në nivel ndërkombëtar, “Dhe ndërsa grupe si ISIS-i u fuqizuan mes kaosit të luftës në Irak dhe më pas në Siri, dhe ndërsa interneti e fshin largësinë midis vendeve, ne shohim përpjekje nga terroristët për të helmuar mendjet e njerëzve, si të bombahedhësve të maratonës së Bostonit dhe të vrasësve të San Bernardinos.”
Toni i presidentit amerikan është ngritur kur ai është zotuar për shkatërrimin e ISIS-it e të çdo organizate tjetër terroriste: “Kërcënimi nga terrorizmi është i njëmendtë, por ne do ta mposhtim atë. Ne do ta shkatërrojmë ISIS-in dhe çdo organizatë tjetër që përpiqet të na dëmtojë.”
Më tej ai ka prekur një çështje thelbësore, për të mos e trajtuar luftën ndaj ISIS-it dhe organizatave terroriste si luftë kundër Islamit.
“Ne nuk mund të kthehemi kundër njëri-tjetrit, duke e lënë këtë luftë të përkufizohet si një luftë mes Amerikës dhe Islamit. Kjo është gjithashtu ajo çka duan grupe si ISIS-i. ISIS-i nuk flet për Islam. Ata janë kriminelë dhe vrasës, pjesë e një kulti vdekjeje… Për më tepër, shumica dërrmuese e viktimave terroriste anembanë botës janë muslimanë. Po qe se duam t’ia dalim në mposhtjen e terrorizmit, ne duhet t’i mobilizojmë bashkësitë muslimane si disa prej aleatëve tanë më të fuqishëm, e jo t’i largojmë përmes dyshimit dhe urrejtjes.”
Në fund, Obama ka kërkuar unitet: “Le të mos harrojmë se liria është më e fuqishme se frika. Se ne i kemi përballuar gjithmonë sfidat, qofshin luftë apo depresion, katastrofa natyrore apo sulme terroriste, duke u bashkuar rreth idealeve tona të përbashkëta si një komb dhe një popull.” /tesheshi.com/
