A ka më mirë sesa gëzimin e dasmës ta ndash jo vetëm me të ftuarit e miqtë, por të marrësh urimet e mijëra njerëzve. Këtë ide patën dhëndëri dhe nusja në qytetin turk Kilis. Ata ftuan 4 mijë refugjatë sirianë për të shijuar me ta banketin e dasmës dhe për të festuar.
Fethullah Üzümcüoğlu dhe Esra Polat u martuan në provincën kufitare me Sirinë javën e kaluar. Në dasmën e tyre morën pjesë refugjatët që janë vendosur aty pasi morën arratinë nga shtëpitë e veta për shkak të luftës civile në Siri.
Refugjatët sirianë tashmë janë bërë pjesë e përditshmërisë në rajonet kufitare, pasi Turqia ka pritur dy milionë të tillë dhe në qytetin Kilis ndodhen rreth 4 mijë refugjatë.
Ideja për të ndarë ditën e tyre speciale me ata që janë me më pak fat ishte e babait të dhëndërit, Ali Üzümcüoğlu. I pyetur nga gazeta e qytetit “Serhat Kilis”, ai tha se shpresonte që të tjerët të mund të bëjnë të njëjtën gjë dhe të ndajnë festimet e banketin e dasmave të tyre me vëllezërit dhe motrat siriane.
“Menduam se një ditë të tillë të lumtur, duhet ta ndanim banketin e dasmës me motrat e vëllezërit sirianë. Dashtë Zoti, kjo do të bëjë që edhe të tjerët të bëjnë të njëjtën gjë e të ndajnë ushqimin me vëllezërit e motrat siriane. Sa për ne, ishte vërtet një banket dasme interesant”, tha ai.
Babai i dhëndërit tha gjithashtu se ishte i kënaqur që çifti e niste jetën e re sëbashku me “një veprim të tillë altruist”.
Të ftuarve në dasmë ua ndanë ushqimin edhe vetë nusja e dhëndëri.
Ata përdorën paratë e mbledhura nga familja për të shtruar banketin. Nusja tregoi se ishte një eksperiencë e mrekullueshme për të edhe pse në fillim ishte tronditur pak kur i shoqi i kishte treguar për idenë. “Jam e gëzuar që pata mundësinë të ndaja ushqimin e dasmës sime me ata që kanë nevojë”, tha ajo. /tesheshi.com/
