Gjermania vazhdon të mbetet streha më e parapëlqyer për refugjatët, veçanërisht nga vendet e përfshira nga konflikte të përgjakshme, siç është Siria. Numri i tyre ka pësuar rënie me ardhjen e dimrit dhe me uljen e temperaturave, por gjithsesi vazhdon të jetë në shifra shqetësuese.
Ndërsa vetëm gjatë nëntorit arritën në Gjermani diku te 206.101 refugjatë, në 11 muajt e këtij viti janë regjistruar 964.574 azilkërkues të rinj. Çka sugjeron se kjo shifër do ta kalojë një milionëshin gjer në fund të dhjetorit.
Nëntori shënoi një rekord krahasuar me tetorin në lidhje me numrin e të ardhurve, kurse numri i të mbërriturve gjatë këtij viti është katër herë më i madh se i tërë vitit të shkuar.
Në krye të të ardhurve mbeten sirianët, për të cilët Gjermania ka zbatuar një politikë të dyerve të hapura.
Vetë ministri i Brendshëm gjerman, Thomas de Maiziere, ka bërë të ditur në një konferencë shtypi se numri i të ardhurve në një ditë sillej tani nga 2000 në 3000, duke e quajtur këtë një zhvillim të mirë, edhe pse jo një pikë kthese, kur krahasohet me 8000 deri në 10000 refugjatët që mbërrinin çdo ditë në muajt e shkuar. /tesheshi.com/
