Zëvendësdrejtori menaxhues i Fondit Monetar Ndërkombëtar, Min Zhu, po qëndron për vizitë dyditore në Kosovë, ku sot u takua me ministrin e Financave Avdullah Hoti.
Kjo është edhe vizita e nivelit më të lartë deri tash e FMN-së në Republikën e Kosovën, thekson njoftimi i sapodërguar nga Ministria e Financave.
Gjatë takimit është diskutuar për rritjen e bashkëpunimit ndërmjet Kosovës dhe Fondit Monetar Ndërkombëtarë, për zhvillimet ekonomike dhe financiare në vend, si dhe për mundësin e nënshkrimit të marrëveshjen ndërmjet Republikës së Kosovës dhe Fondit Monetar Ndërkombëtar.
Ministri Hoti e falënderoi Min Zhu për vizitën e tij të parë në Kosovë dhe informoi atë për Planin zhvillimor të Qeverisë së Kosovës, ku sipas tij parashihen një sërë masash të cilat kanë të bëjnë me zhvillimin ekonomik dhe financiar të Kosovës. Ai me këtë rast gjithashtu konfirmoi edhe njëherë përkushtimin e Qeverisë së Republikës së Kosovës për bashkëpunim sa më të ngushtë me FMN-në.
Ndërsa, Zëvendësdrejtori menaxhues i FMN-së. Min Zhu e vlerësoi lartë përkushtimin e Qeverisë së Kosovës dhe progresin e arritur në Kosovë deri më tani dhe gjithashtu bëri të ditur se vizita e tij në Republikën e Kosovës tregon përkushtimin e FMN-së për zgjerimin e marrëdhënieve ndërmjet Kosovës dhe Fondit Monetar Ndërkombëtar.
“Pas vizitës së Zëvendësdrejtorit menaxhues të FMN-së Min Zhu, ekipi i misionit të FMN-së do të fillojë negociatat për një program të ri të Kosovës me FMN-në. Ky program i ri me FMN-në, e rrit besueshmërinë e partnerëve tanë dhe institucioneve financiare ndërkombëtare ndaj Qeverisë së Kosovës dhe mundëson hyrjen në kredi afatgjate, me kushte shumë të volitshme, për të financuar projektet madhore të Qeverisë Mustafa”, thekson Ministria kosovare e Financave.
Për vizitën njofton edhe Përfaqësuesi Rezident i Fondit Monetar Ndërkombëtar në Kosovë, Frank Lakëijk. Ai dërgon ftesën për ligjeratën që do të mbahet nga Min Zhu nesër në Universitetin e Prishtinës, Fakultetin Ekonomik, si dhe për konferencën e shtypit që do mbahet më pastaj në ndërtesën e qeverisë.
Fondi Monetar Ndërkombëtar ka votuar pro anëtarësimit të Kosovës në këtë organzizatë në vitin 2009.
“Në votimin për anëtarësimin në Fondin Monetar Ndërkombëtar, dhe në Bankën Botërore, Kosova ka fituar mbështetje edhe prej vendeve që e kanë njohur pavarësinë e saj, edhe prej vendeve të tjera që janë në proces të njohjes”, deklaronte Hashim Thaçi, atëherë kryeministër, i pyetur më 4 qershor, duke theksuar se anëtarësimi është vlerësim për Kosovën.
