Sulmuesi i Rijekës ka shënuar sërish. Është Bekim Balaj që po tregon se ka arritur një formë mjaft të mirë dhe se po e udhëheq skuadrën e tij me gola të njëpasnjëshëm. I radhës ishte ndaj Osijek. Shkodrani ka hapur serinë e golave në fitoren 3-0 që skuadra e tij mori lehtësisht në shtëpi. Kjo ishte edhe hera e nëntë për shqiptarin që i detyron portierët kundërshtarë të nxjerrin topin nga rrjeta, transmeton Panorama Sport.
Goli i nëntë në vetëm në 13 ndeshje për shkodranin, një statistikë me të vërtetë pozitive në gjysmën e parë të sezonit që është bashkuar me ekipin kroat. Në minutën e 18-të, Balaj ndjek me kujdes një aksion të skuadrës së tij dhe, pasi merr një pasim nga e djathta, bën gjënë e duhur dhe arrin ta shndërrojë në gol. Sulmuesi është një gjahtar i vërtetë goli kur bëhet fjalë për topa që i zotëron brenda zonës së rreptësisë.
Sulmuesi i Kombëtares ka kaluar Rijekën në avantazh dhe i ka hapur udhë suksesit që është shumëfishuar nga Shabani në të 34-tën dhe nga Tomasov në të 66-tën. Sulmuesi shkodran po kalon një formë mjaft të mirë në kampionatin kroat. Edhe pse në muajt e parë të transferimit të tij te Rijeka, bomberi i Kombëtares është përshtatur në mënyrën më të mirë të mundshme.
Duke shënuar në mënyrë të rregullt, Balaj ka justifikuar besimin e drejtuesve dhe trajnerit të skuadrës, si për të mos e ndier mungesën e një sulmuesi si Kramariç. Supersulmuesi, që iu desh Balajt ta zëvendësonte. Ky i fundit ka bërë me të vërtetë shumë në pjesën e parë të sezonit, duke shënuar 21 gola, por edhe Bekim Balaj duket se po e ndjek më së miri rrugën e tij.
Sulmuesi shkodran ka qenë edhe i pafat në minutat e fundit të ndeshjes. Një “predhë” e tij e lëshuar nga rreth 18 metra është ndalur në traversë, duke i mohuar golin e dytë personal sulmuesit të Kombëtares. Nëntë gola në 13 ndeshje nuk janë pak për një lojtar që është në muajt e tij të parë me një skuadër të re. /tesheshi.com/
