“Nuk kam nevojë për paratë e askujt dhe nuk do të përdor paratë e lobistëve. Do të përdor paratë e mia. Unë jam shumë i pasur. Jam me të vërtetë i pasur”. Kanë qenë këto fjalët që miliarderi Donald Trump ka thënë gjatë një njoftimi zyrtar, ku ka bërë me dije kandidimin e tij me Partinë Republikane, në zgjedhjet e ardhshme për Presidentin e Amerikës dhe kreun e Shtëpisë së Bardhë.
“Lobistët,-ka shtuar ai,- kanë zero mundësi të më bindin apo të më ndikojnë”. Pasuria neto e Trump vërtitet rreth 9 miliardë dollarë.
“Amerikës i duhet një lider i madh”,- deklaron Trump. Ai është paraqitur si një ‘fitues’ në një Amerikë që ‘nuk fiton më’, që humbet kundër Kinës, kundër Japonisë, kundër Meksikës, kundër gjithë pjesës tjetër të botës.
I veshur me ngjyrat e flamurit amerikan, xhaketë blu, këmishë bardhë dhe kollare e kuqe, ai ka sulmuar administratën aktuale si dhe të gjithë republikanët që bëjnë vetëm retorikë dhe që nuk flasin për problemet reale të Amerikës.
“Amerika ka nevojë për një lider të vërtetë dhe të fortë. Barack Obama nuk është një lider por një ‘cheerleader’ (nxitëse tifozazh)”,- ka thënë miliarderi duke folur nga Trump Tower në New York.
Nuk është e rastësishme që sipërmarrësi i madh i njohur në të gjithë botën, ka zgjedhur si sfond jetën e tij të mbushur me miliarda, duke rrëfyer njëkohësisht edhe sukseset e veta.
“Zonja dhe Zotërinj, do të kandidoj zyrtarisht për presidencën e Shteteve të Bashkuara. Do ta çojmë vendin në rrugën e duhur”,- ka shtuar Trump. Pak kohë më parë, duke folur për mundësinë e kandidimit, ai ka thënë se është ‘i vetmi që mund të mposhtë Hillary Clinton”.
Trump, i lindur në Queens, në New York, 69 vite më parë, e kishte marrë në konsideratë edhe vitet e shkuara mundësinë për të kandiduar, por kjo është kandidatura e tij e parë. Një ditë më parë ai ka sulmuar nëpërmjet një mesazhi në Twitter, Jeb Bush, të preferuarin për tu dominuar nga republikanët. “Me të vërtetë kemi nevojë për një Bush tjetër në Shtëpinë e Bardhë?”,- ka shkruar ai.
Trump është bërë kështu kandidati i 12-të zyrtar mes republikanëve. Sipas një sondazhi të fundit të Quinnipiac University, 7 zgjedhës në 10, në nivel kombëtar, kanë një mendim negativ për të, përfshirë edhe 52% të republikan3ëve.
Sipas mediave dhe sondazheve të Real Clear Politics, Trump është kandidati i nëntë i preferuar nga republikanët, me 3.6% të preferencave, në një klasifikim të ekuilibruar, të kryesuar nga Bush me 10.8%./tesheshi.com/
