Që nga maji, kur emri i Klemend Balilit, një zyrtar i LSI-së në Sarandë u bë i njohur nga mediat greke duke u etiketuar “Eskobari i Ballkanit”, Ilir Meta nuk ka folur për të. Por kjo deri tek mbrëmja e kësaj të mërkure, kur ai, pas kthimit nga SHBA i ka përcjellë një mesazh gjysëm denoncues dhe gjysëm apelues kreut të shtetit, pikërisht me në qendër ish-njeriun e tij, duke vepruar ndoshta sipas paradigmës që “mbrojtja më e mirë është sulmi”
Ka marrë laps e letër zyrtare dhe i ka kërkuar Presidentit dora vetë, që për këtë çështje, pra për Balilin, të mbledhë urgjentisht Këshillin e Sigurisë Kombëtare.
“Në cilësinë e Kryetarit të Këshillit të Sigurisë Kombëtare, Ju të thërrisni në një kohë sa më të shpejtë një mbledhje të Këshillit të Sigurisë Kombëtare, me qëllim analizimin e të gjitha veprimeve apo mosveprimeve të institucioneve shqiptare të ngarkuara me ligj për ndjekjen e procedurave për çështje të tilla”, – shkruan Meta.
Kreu i Kuvendit shprehet gjithashtu se “Thirrja e mbledhjes së Këshillit të Sigurisë Kombëtare për çështje, do të dëshmojë seriozitetin e institucioneve dhe organeve të shtetit shqiptar për adresimin e përgjegjësive konkrete si dhe angazhimin që ato kanë në trajtimin e rasteve të tilla, me impakt në sigurinë kombëtare”, – shkruan Meta.
Për të gjithë ata që ndjekin imtësisht zhvillimet politike, është e kuptueshme që akti i Metës ka në shenjestër ministrin Tahiri, pra atë që nuk e ka arrestuar deri më sot Balilin; ndërkohë që duhej të kishte më së pari për debat emërimin e Balilit nga LSI si drejtor institucioni. /tesheshi.com/
