Në fjalorin fshikullues të Berishës sa i përket epiteteve krahasimore ndaj kundërshtarëve politikë, është futur së fundi dhe Noriega.
Ai pason me dhjetra të ngjashëm në mbi dy dekada politikë aktive, ku veçohen “Mark Abdia”, “Mamudhi i korrupsionit”, “Klani Zemunit” dhe “Duka i Krimit”, “Horri i bulevardit”, “Dritan Dullaku”, “Saje Qorri”, etj.
Por që kur Edi Rama mori urdhërin më të lartë të Republikës Franceze, atë të Komandantit të Legjionit të Nderit, media pranë Berishës e krahasuan atë me titullin që iu dha nga Presienti francez Manuel Noriegës, që në fakt është tërhequr dhe anuluar si dekret presidencial.
Po ç’lidhje ka historia e Manuel Noriegës me Shqipërinë, Edi Ramën apo socialistët në qeveri?
I thirrur si “fytyrë ananasi” për shkak të vragave në fytyrë që i ngjanin lëkurës së frutit ekzotik, Manuel Noriega është një politikan dhe ushtarak nga Panamaja, vendi më i rëndësishëm strategjik i Amerikës Qendrore, pasi në këtë vend ndodhet Kanali që lidh Europën me Amerikën dhe që përshkrohet nga anijet që udhëtojnë përtej Oqeanit Atlantik dhe anasjelltas.
Panamaja, si udhëkryq tregëtie është edhe vend i gjallimit të asaj që quhet bota e spekulimit financiar apo of shore.
Manuel Noriega u ndihmua nga CIA që bëhet njeriu më i fuqishëm i Panamasë në vitet ‘60 të shekullit të shkuar, por në vitin 1989, ushtria amerikane ndërhyri në Panama dhe e arrestoi atë në bazë të një vendimi të një gjykate të Floridas që e dënoi me 40 vjet burgim për trafik të kokainës dhe pastrim të parave në territorin e Shteteve të Bashkuara të Amerikës.
Ndërkaq, Noriega pas lirimit nga SHBA në vitin 2011 do të vazhdonte dënimin në një gjykatë në Francë, sërish i dënuar për veprën penale të trafikut, vrasjeve dhe pastrimit të parave.
Noriega nuk ka qenë publikisht një drejtues pushteti, pra president apo kryeministër, por shef i shërbimit sekret dhe shef i shtabit të përgjithshëm të ushtrisë me pushtet absolut, aq sa ka ndërhyrë disa herë në grushte shteti. Ishte praktikisht njeriu më i fortë i vendit.
Dhe gjatë operacionit Just Cause ku Presidenti Bush(plaku) dërgoi 20 mijë ushtarë në Panama për ta pushtuar, u zhvilluan luftime të ashpra me forcat e Noriegës.
Në Panama ndodhej edhe një bankë of shore ku depozitoheshin paratë e trafikantëve më të rëndësishëm të kokainës, ndër të cilët edhe Pablo Esscobar.
George Jung, ishte trafikanti më i fuqishëm i kokainës në SHBA që firnizohej nga klani i Medellinit në Kolumbi, klan që drejtohej nga famëkeqi Escobar.
Jung depozitoi paratë e tij në Bankën e Panamasë, por qeveria e SHBA nëpërmjet njerëzve të saj arriti të sekuestrojë çdo qindarkë.
Siç shihet pra, elementi “drogë” është ai që mund të bashkojë deri diku dy realitete individuale, larg në kohë, distancë dhe kontekst: atë mes Ramës dhe Noriegës.
Ndërsa në një plan tjetër, Noriega mund ta ketë alteregon e tij shqiptar dhe tek ajo pjesë e politikës që ka instaluar sistemin mafioz në drejtësi dhe administratë dhe që nuk po e përkrahë aksionin ndërkombëtar për të pastruar drejtësinë shqiptare, për të nisur më pas një superoperacion kundër korrupsionit.
Pra, Noriega shqiptar mund të gjendet sa në njërin krah të politikës aq dhe në tjetrin. /tesheshi.com/
