Presidenti amerikan arriti të përmbushë një prej premtimeve të tij elektorale e të arrijë fitoren e parë në Kongres me shfuqizimin e së ashtuquajturës “Obamacare”.
Donald Trump e ka quajtur atë të vdekur teksa Dhoma e Përfaqësuesve miratoi projektligjin republikan të kujdesit shëndetësor.
Miratuar me 217 vota e 213 kundër, kalimi i Aktit Amerikan të Kujdesit Shëndetësor përbën një fitore për Trump-in, e para e tillë në fushën legjislative.
“Mos bëni gabim, ky është një shfuqizim,” do të deklaronte Trump pas votimit. “Obamacare ka vdekur!”
Megjithatë, projektligji republikan duhet të marrë dhe miratimin e Senatit, diçka që nuk duket aq e thjeshtë për t’u arritur nëse kihet parasysh ekuilibri i forcave.
Rivalja e Trump-it në zgjedhjet presidenciale, Hillary Clinton, reagoi me ashpërsi. Dështim të turpshëm të politikës dhe moralitetit e quajti ajo miratimin e projektligjit republikan, duke u bërë thirrje njëkohësisht demokratëve të ngrejnë zërin e të luftojnë në emër të miliona familjeve që do të preken nga shfuqizimi i “Obamacare”-it. /tesheshi.com/
