Ministrja e Infrastrukturës dhe Energjisë, Belinda Balluku, deri pak kohësh drejtoreshë e Aviacionit Civil Shqiptar, ka reaguar ashpër ndaj grabitjes së kësaj të marte në Rinas, për të dytën herë, ku pati dhe një viktimë nga ana e grabitësve, gjatë këmbimit të zjarrit me policinë. Megjithatë, rreth 10 milion euro u morrën nga barku i një avioni që do nisej nga Tirana drejt Vjenës, ku dhe u ngarkua sasia e parave, ardhur nga një bankë e nivelit të dytë.
“Kjo është një ngjarje shumë e rëndë dhe e përsëritur për fat të keq. Të gjitha përpjekjet e autoriteteve shtetërore për t’i imponuar kompanisë kineze, që mban në koncesion Aeroportin e Rinasit, investimet e nevojshme në sistemin e sigurisë, nuk janë dëgjuar ashtu si duhet”, deklaron ministrja Balluku, duke nxjerrë kështu në pah fakti se përgjegjësia nuk është e autoriteteve shtetërore.
“Sistemi i sigurisë ka rënë përsëri dhe përsëri grabitësit kanë mundur të hyjnë deri në pistë, duke provuar se në këto kushte aeroporti është i kërcënuar lehtësisht, deri edhe nga akte më të rënda se kaq. Ky është një alarm, që këtë herë s’duhet të kalojë dhe s’do të kalojë, vetëm me nxjerrjen para drejtësisë të personave përgjegjës nga radhët e teknikëve dhe punëtorëve të TIA për sigurinë. Këtë herë shteti duhet dhe do të thotë shumë shpejt një fjalë më shumë”, thekson ministrja Balluku, duke paralajmëruar se shteti kësaj herë duhet të ndërhyjë fort.
“Fakti që aeroporti, njësoj si të gjithë aeroportet në Europë, nuk mbrohet e as garantohet në sigurinë e vet nga Policia e Shtetit, po nga sistemi i sigurisë së vetë kompanisë, nuk do të thotë aspak se ne duhet e do të rrimë me duart të lidhura. Aspak. Shteti do të flasë qartë dhe do të veprojë me të gjithë fuqinë e detyrimit për të garantuar sigurinë dhe funksionimin normal të aeroportit të vetëm ndërkombëtar të vendit”, theksoi gruaja në krye të Infrastrukturës dhe Transporteve, njohëse e imtësishme e gjitha asaj çfarë ndodh në Rinas. /tesheshi.com/
