Kandidati i majtë dhe i djathtë për bashkinë e Tiranës, Erion Veliaj dhe Halim Kosova kanë qenë të dy pasditen e sotme në një takim elektoral në njësinë 7 në kryeqytet.
Ndërsa kandidati Veliaj shprehej se turpi i kundërshtarit është forca e tij, kandidati Kosova deklaroi se ndonjëherë mendon që kryeministri Edi Rama do ta ndihmojë më shumë se kreu i Partisë Demokratike, Lulzim Basha.
“Ne do të punojmë për familjet e shqiptarëve, ata le të merren me familjet tona. E mbuluan me batanije Saliun për 4 javë dhe nuk doli nga shtëpia. Më pas u thanë Amerikanët: “Mbuloni edhe Lulin, mos e çoni në Tiranë se humbni vota, se s’ka bërë asnjë punë për 4 vjet”. Po ku iu durua Saliut? Doli si bishë e plagosur duke sharë e duke shfryrë, por turpi i tyre është forca jonë. Ju themi përditë: “Ejani në debat, ejani të flasim se pse nuk erdhi trami, pse nuk ka ujë 24 orë?” Shkatërroi Tiranën dhe e çoi në kundravajtjte. Ka ardhur koha ta çojmë në drejtimin e duhur”,- tha Veliaj.
Ai deklaroi se në njësinë 7 kanë evidentuar 285 probleme, që për të janë 285 mundësi për ti shërbyer njësisë 7 në 7 ditë të javës.
Veliaj deklaroi se kundërshtarët kanë nisur t’i kopjojnë për problemet e Tiranës dhe thonë se kanë zgjidhjet e duhura.
Nga ana e tij, kandidati Halim Kosova deklaroi se e ndien veten të privilegjuar që Erion Veliaj merr nga programi i tij, por tjetër gjë është të thuash, e tjetër gjë është të bësh.
“Nëse sot Kryeministri Rama shan e përdhos, pas dy ditësh ul zërin e tonin. Pranë meje do të jenë vetëm njerëz që do të arrijnë të ndjekin ritmin tim e që do të kenë takat të kryejnë punë. Do ti afrojmë Tiranës njerëzit që janë të përkushtuar, që janë pranë jush për t’ju zgjidhur hallet dhe problemet që i keni mjaft të mëdha. Mbas 21 qershorit, nga unë do të keni vetëm punë e jo fjalë. Puna jonë e përbashkët është vetëm ajo që do ta çojë Tiranën, çdo familje e çdo lagje, aty ku ju e meritoni”,- tha Kosova.
Gjatë falës së tij ai deklaroi: “Shumë shpejt zoti Rama do të jetë përkrah meje, por ai e di se cila është kandidatura më e mirë për qytetarët e Tiranës. Do të jetë një nga aleatët e mi më të mirë për projektet në funksion të qytetarëve, e ndonjëherë e mendoj se ka për të më ndihmuar më shumë se Basha, ishalla jo, po…”./tesheshi.com/
