Ngjan si e pabesueshme që nga Greqia të dalë një zë kundër Fredi Belerit, madje të aludojë se ai, njeriu që ka fituar pabesueshëm Himarën më 14 maj, ka qenë një vrasës, siç dhe akuzohet për ngjarjen e rëndë të Peshkëpisë më 1995, kur një komando greke kaloi kufirin shqiptar në Gjirokastër dhe sulmoi një repart ushtarak duke vrarë dy oficerë.
Dhe jo një njeri dosido, por një ish-zëvendësministër i Jashtëm, më konkretisht Nikos Xydakis i ish-qeverisjes së Syriza-s, ka deklaruar se Beleri nuk është aq i pastër.
Më saktë, duke folur për ERT, Xydakis tha se Beleri nuk është një njeri i pafajshëm dhe se nuk duhet të bëhet një problem për marrëdhëniet diplomatike mes Shqipërisë dhe Greqisë.
“Athina dhe Tirana e dinë rolin e Belerit. Ai nuk është një njeri i pafajshëm, ai ka një histori politike dhe një histori të errët. Duhet ta kishte pastruar këtë histori shumë muaj më pare dhe të mos bëhet një gjemb diplomatik në marrëdhëniet jo aq të mira mes Athinës dhe Tiranës”, tha ai.
Me “histori të errët”, ka lënë të nënkuptuar pikërisht ngjarjen e Peshkëpisë.
Beleri nuk është gjykuar kurrë për atë ngjarje, ndërkohë që nuk i është qasur Himarës si menaxher, por si njeri ne axhendë të qartë politike.
Askush nuk e di se ç’profesion ka Beleri dhe cila është një histori suksesi e tij në jetë. /tesheshi.com/
