Deklarata e liderit të NATO-s se rruga e Ukrainës drejt NATO-s është “e pakthyeshme” tregon se aleanca është e përkushtuar që Kievi t’i bashkohet radhëve të saj, tha Sekretari i Përgjithshëm i NATO-s, Jens Stoltenberg.
“Ky është një mesazh i fortë nga aleatët e NATO-s se ne vërtet dëshirojmë që Ukraina të anëtarësohet, se ne po punojmë me Ukrainën për ta realizuar atë”, tha ai në një konferencë shtypi në samitin e NATO-s në Uashington, duke vijuar kështu sfidën ndaj Rusisë, e cila mu për këtë arsye vendosi të sulmojë Ukrainën. Pra, për t’i çuar një sinjal Perëndimit se nuk mund të vijojë t’i afrohet kufijve të Rusisë.
Në të njëjtën kohë, aleanca ushtarake perëndimore njoftoi se një bazë e re e mbrojtjes ajrore amerikane në Poloninë veriore, e projektuar për të zbuluar dhe për të kapur sulmet me raketa balistike si pjesë e mburojës më të gjerë raketore të NATO-s, është gati për mision.
Anëtarët e NATO-s riafirmuan gjithashtu zotimin e tyre për ndihmë afatgjatë për Ukrainën për të siguruar pajisje ushtarake dhe për të ndërtuar forca të afta për të mposhtur Rusinë.
Përmes kontributeve proporcionale, aleatët synojnë të sigurojnë një financim bazë minimal prej 40 miliardë eurosh në vitin e ardhshëm dhe të sigurojnë një nivel të qëndrueshëm të asistencës së sigurisë për Ukrainën.
Përveç mbështetjes ushtarake të mbuluar nga ky premtim, aleatët synojnë të vazhdojnë të ofrojnë mbështetje politike, ekonomike, financiare dhe humanitare për Ukrainën.
Shefi në ikje i Aleancës, Jens Stoltenberg, tha se gatishmëria e bazës ishte një hap i rëndësishëm për sigurinë transatlantike përballë kërcënimit në rritje të paraqitur nga raketat balistike.
“Si një aleancë mbrojtëse, ne nuk mund ta injorojmë këtë kërcënim. Mbrojtja nga raketat është një element thelbësor për misionin kryesor të mbrojtjes kolektive të NATO-s”, shtoi ai, duke vënë në dukje se raketat balistike janë përdorur gjerësisht në konfliktet në Ukrainë dhe Lindjen e Mesme.
Sistemi, i quajtur “Aegis Ashore”, është i bazuar në qytetin verior polak të Redzikoëo dhe është i aftë të përgjojë raketa balistike me rreze të shkurtër dhe të mesme.
NATO thotë se “Aegis Ashore” është thjesht mbrojtëse.
Rreth 200 personel ushtarak janë të stacionuar në dy pika përgjimi në Poloni dhe Rumani, dhe baza në qytetin rumun të Deveselu ka qenë funksionale që nga viti 2016.
Kështu, Perëndimi vendos të shkojë “majë më majë” me Rusinë, pa asnjë tërheqje, duke çuar në perceptimin se tashmë vetëm lufta mes tyre i “lan hesapet”. /tesheshi.com/
