Sigurisht të vendosësh një titull të tillë, të gjithë do të kërkojnë të dinë sa më shpejt të vërtetën, për më tepër kur flitet për një lojtar, nga ata që sportdashësit, do të donin t’i shihnin të luanin gjithë jetën. Por është e vërtetë: Pirlo mund të luajë shumë shpejt për Juventusin. E nëse mbiemri është i madh, emri është ai që sqaron situatën.
Bëhet fjalë për Nicolo Pirlo, djali 15-vjecar i Andreas së famshëm, i cili la futbollin pak muaj më parë. Sipas mediave në Torino, djaloshi i ditëlindjes 2003, do të bëjë së shpejti një provë tek Juventus, për t’u përfshirë tek ekipi U16 i bardhezinjve.
Me numrin 8 në shpinë, ndryshe nga i ati, Nicolo Pirlo luan prej 3 vjetësh për ngjyrat e skuadrës periferike Pecetto, e prej kohësh është vënë në vëmendjen e Juventusit.
Babai i tij, kampioni i Botës Andrea Pirlo, përpiqet ta prezantojë të birin para botës, pavarësisht rëndesës që i ka dhënë fanellës së futbollistit, ai vetë. “Unë kur shoh një djalosh të luajë, shikoj mbi të gjitha, si e ndalon topin, e si e pason atë. Kuptohet menjëherë, nëse di ta ndalojë e pasojë topin, është shumë i mirë. Nicolo më ngjan shumë, është teknik dhe jo tip lojtari që përplaset. Por argëtohet si unë kur luan me topin, e kjo është një nga gjërat më të rëndësishme të futbollit” – shprehet Andrea Pirlo.
Do të ketë vogëlushi Nicolo klasin e të atit, e do të arrijë ai të mbajë lart, mbiemrin në fanellë, kjo është për t’u parë. Gjithsesi, kur bëhet fjalë për një Pirlo, të gjithë janë kuriozë të shohin një lojtar, që mund të ecë edhe në gjurmët e të atit. /tesheshi.com/
