Dy të vdekur dhe një i plagosur qe bilanci i një sulmi ditën e djeshme mbi ambasadën e Koresë së Jugut në Tripoli, në kryeqytetin libian. Sulmi u mor përsipër nga ISIS-i, Shteti Islam i Irakut dhe Shamit.
Njerëz të armatosur hapën zjarr mbi ndërtesën e ambasadës nga një makinë në lëvizje, duke lënë pas viktima, deklaroi një zëdhënës i ministrisë së Punëve të Brendshme të Libisë.
Dy personat që humbën jetën ishin rojet libiane të godinës. Ambasada është e mbyllur prej muajsh, por ende ka punonjës koreanojugorë brenda saj.
Ministria e Punëve të Jashtme e Koresë së Jugut e konfirmoi sulmin, duke shtuar se personeli i saj, përfshirë dy diplomatë, nuk qe lënduar. Gjithsesi, ende nuk është e qartë nëse objektivi i sulmit ishte ambasada, apo rojet libiane.
ISIS-i pati marrë përsipër dhe sulmin kohë më parë mbi hotelin luksoz Corinthia në Tripoli, në të cilin mbetën të vrarë nëntë persona, mes të cilëve një shtetas amerikan, një francez, e një koreanojugor.
Libia është në kaos që prej revoltës së vitit 2011, që solli rrëzimin dhe ekzekutimin e Gadafit. /tesheshi.com/
