Shishja e parfumit që përmban agjentin nervor Novichok, i cili helmoi Dawn Sturgess në Mbretërinë e Bashkuar në vitin 2018, përmbante “helm të mjaftueshëm për të vrarë mijëra njerëz”, raporton The Mirror.
Një hetim për vdekjen e saj u hap të hënën, më 14 tetor, dhe pamjet e vëzhgimit u publikuan për herë të parë që tregonin ish-spiunin Sergei Skripal dhe vajzën e tij Yulia duke ecur në Salisbury pak pasi u helmuan.
Një orë pasi Sergei preku dorezën e derës të veshur me Novichok, ai u filmua duke mbajtur kokën teksa dilte nga kafeneja, por mbijetoi, ashtu si edhe vajza e tij. Besohet se anëtarët e njësisë së inteligjencës ushtarake ruse u përpoqën ta vrisnin. Katër muaj më vonë, Dawn Sturgess ra në kontakt me helmin pasi ra në kontakt me një shishe parfumi në Wiltshire.
Atë ia dha i dashuri i saj në atë kohë, Charlie Rowley, i cili gjithashtu mbijetoi, por Dawn jo.
Një urdhër-arresti ndërkombëtar është lëshuar për tre rusë, të cilët autoritetet besojnë se ishin të përfshirë në sulme. Dy të dyshuarit kanë thënë në një intervistë për mediat ruse se kanë qenë për një kohë të shkurtër në Britaninë e Madhe, për të vizituar katedralen në Salisbury.
Ish-spiuni Skripal nuk do të dëshmojë në hetim për shkak të frikës për sigurinë e tij, megjithëse familja Sturgess kërkoi dëshminë e tij në një seancë paraprake.
Avokatët e familjes thanë se Sturgess ka bërë një jetë të “larguar plotësisht nga bota e politikës dhe marrëdhënieve ndërkombëtare”, ndaj theksojnë se ajo është një viktimë e pafajshme në këtë situatë, e cila pa vetëdije ka aplikuar helm në lëkurën e saj.
“Dëshmitë sugjerojnë se kjo shishe, e cila përmbante mjaftueshëm helm për të vrarë mijëra njerëz, duhet të ishte lënë më parë diku në publik, duke krijuar rrezikun që dikush ta gjente dhe ta merrte në shtëpi. Ata që e hodhën shishen vepruan me një shpërfillje groteske për dinjiteti njerëzor”, pohojnë avokatët e familjes Sturgess, raporton Mirror. /tesheshi.com/
