Turki Fahad, njeriu që qëndron në krye të një panairi të veçantë në qendër të Tiranës,
brenda një megaçadre, duhet t’i ngjajë bashkëatdhetarit të tij Zejd, të viteve ’30-të, arabit të ëmbël që shoqëronte në një udhëtim aventuresk me theks fetar hebreun e dashuruar me tokën e shpirtin arab Leopold Waiss, në endjen shpirtërore e rraskapitëse të këtij të fundit gjatë kalimit në Islam, siç rrëfen vetë ai te autobiografia “Rruga për në Mekë”.
Fahad, ashtu si Zejdi, ka një tërheqje të fortë mu prej një thjeshtësie, ëmbëlsie në komunikim, përulësië në sjellje, duke pritur e përcjellur me salutime e shpjegime çdokënd prej dhjetra vizitorëve të “Ura”-s saudite, të cilët shkojnë te “shtëpia” e tij në fund të çadrës, një odë tipike arabe me arredimin e afro një shekulli më parë, ku ai ka vendqëndrimin e tij si koordinator i panairit.
“Ura”, hapur prej ditësh, është shpalosja e shpirtit dhe traditës arabe brenda pak metrave katrorë, nëpërmjet stendave të veçanta, për të njohur tharmin por dhe sharmin e një vendi, i cili ushqehet dhe jeton me krenarinë e zbritjes aty, në atë tokë, të shpalljes së fundit hyjnore nga Krijuesi, Zoti i botrave, për të gjithë njerëzimin, me anë të Profetit të fundit, vulës së Profetësisë, Muhamedit, paqja e Zotit qoftë mbi të.
Madje ky identitet bazë saudit është filli kryesor që përshkon panairin, ku në stenda serviret sa pak histori fetare po aq dhe udhë në të njohurit sa më mirë të Islamit, një besim i përbotshëm në çdo cep të globit që përthith e ngërthen me mijëra shpirtëra të racave, gjuhëve e kulturave të ndryshme.
Te “Ura” në qendër të Tiranës llogariten afro shtatë mijë viziorë në ditë qyshse është hapur, të cilët enden brenda një çadre me një aromë ndjellëse që vetëm arabët mund ta ofrojnë, duke sfiduar dhe parfumet e famshme të vipërisë botërore. Në hyrje të çadrës të mirëpret një kafe arabe, e cila është unike në aromë e shije, deri në pangopshmëri.
Siç të shpjegojnë, është një lloj kafeje që Saudia tani po e prodhon dhe vetë, në krahinën Xhazani.
Më pas vijnë stendat njëra pas tjetrës, me gjithçka që karakterizon Arabinë Saudite, ky kryesor është besimi, Islami, Kurani, dija mbi sublimitetin hyjnor.
Koordinatori Turki Fahad është i suprizuar nga ky takim me Shqipërinë, nga ky interesim i madh për panairin, edhe me të huaj të shumtë si vizitorë veç shqiptarëve, duke qenë plot mbresa nga këta të fundit. Kjo është hera e parë e tij që vjen në Shqipëri dhe, siç thotë, qenka shumë më mirë se ç’ja kishin përshkruar.
Një taksist që nuk i ka marrë lekë, duke ia bërë dhuratë shërbimin taksi, si dhe berber që e kish sajdisur me shumë dashuri e respekt, janë dy nga përjetimet e tij të veçanta në pak ditë qëndrimi në Tiranë.
Ja pra çdo të thotë “Ura” mes popujve, siç ky panair me aromë besimi dhe komunikimi ndërkulturor mes jo të njëjtave si racë e gjuhë, në funksion të një harmonie mes të ndryshmeve, siç Zoti në Kuran e potencon fort si urtësi e krijimit të Tij: “O njerëz! Ne ju krijuam prej mashkulli dhe femre, dhe ju bëmë popuj e fise, që të njiheni me njëri-tjetrin”. /tesheshi.com/
