Kryeministri hungarez Viktor Orbán tha të premten se grupet e punës janë duke u përgatitur në Bruksel se si NATO mund të marrë pjesë në luftën ruso-ukrainase.
Ka disa ngjashmëri alarmante mes tani dhe periudhës kur po bëheshin përgatitjet për Luftën e Parë dhe të Dytë Botërore, tha Orban për shërbimin publik Kossuth Radio, transmeton Reuters.
“Ajo që po ndodh sot në Bruksel dhe Uashington, ose aktualisht më shumë në Bruksel se në Uashington, krijon disponimin për një konflikt të mundshëm ushtarak, të cilin mund ta përshkruanim si një përgatitje për hyrjen e Evropës në luftë”, tha ai.
Lidhur me situatën e Hungarisë në këtë kontekst, Orbán tha se Hungaria, si anëtare e NATO-s, ka përfaqësues në ato grupe, “por ne nuk duam të marrim pjesë në konflikt, as me kontribut financiar, as duke dërguar armë, madje as brenda NATO-s.”
“Në historinë e NATO-s, nuk ka pasur kurrë një situatë kur një shtet anëtar do t’u përmbahej kaq hapur dhe qartë parimeve themelore të NATO-s siç po bën tani Hungaria,” tha Orbán për radion publike, duke shtuar se Hungaria duhet të “ripërcaktojë pozicion brenda aleancës ushtarake”.
Ai shtoi se frika se Rusia do të sulmojë një anëtar të NATO-s është e pabazë, duke shtuar se lufta në Ukrainë, e cila po vazhdon tash e tre vjet, ka treguar kufijtë e aftësive të Rusisë.
“Ushtria ruse po bën një luftë serioze dhe të vështirë me ukrainasit”, tha Orban në një intervistë për radion publike. “Nëse rusët do të ishin mjaftueshëm të fortë për të mposhtur ukrainasit me një goditje, ata do ta kishin bërë tashmë”.
Hungaria, kundër ndihmës ushtarake për Ukrainën
Orban tha se aftësitë ushtarake të NATO-s i tejkalojnë ato të Ukrainës, kështu që nuk ka gjasa që Rusia apo ndonjë vend tjetër të sulmojë NATO-n.
“Nuk e konsideroj të logjikshme që Rusia, e cila nuk mund as Ukrainën, të vijë papritur dhe të gëlltisë të gjithë botën perëndimore”, tha Orban. “Shanset që kjo të ndodhë janë jashtëzakonisht të ulëta.”
Orban tha se ai e konsideronte përmendjen e kërcënimit rus si një prelud për përfshirjen më të thellë perëndimore në luftën e Ukrainës.
Hungaria, një anëtare e Bashkimit Evropian dhe NATO-s, refuzon të ofrojë ndihmë ushtarake për Ukrainën në mbrojtje kundër një pushtimi rus që filloi në shkurt 2022.
Budapesti gjithashtu dëshiron të tërhiqet nga plani afatgjatë i NATO-s për të ndihmuar Ukrainën, me ministrin e saj të jashtëm që e quajti atë një “mision të çmendur”.
Orban, në pushtet që nga viti 2010, e ka ndërtuar fushatën e tij për zgjedhjet e Parlamentit Evropian të muajit të ardhshëm duke shmangur përfshirjen më të thellë në konflikt dhe mesazhet se votimi mund të përcaktojë rrjedhën e luftës dhe paqes në Evropë.
“Ne hungarezët besojmë se këto zgjedhje të ardhshme do të kenë të bëjnë me luftën dhe paqen, dhe natyrisht edhe me migrimin dhe mbrojtjen e familjeve tradicionale, por çështja e luftës tani është përpara të gjitha çështjeve të tjera të rëndësishme”, tha Orban.
Marrëdhëniet midis Budapestit dhe Uashingtonit janë acaruar nga vonesa e Hungarisë në ratifikimin e pranimit të Suedisë në NATO, si dhe nga lidhjet e ngushta të Orbanit me Moskën, pavarësisht luftës në Ukrainë. /tesheshi.com/
