Kreu i diplomacisë europiane Joseph Borrel, i ka përcjellë një letër kryeministrit Albin Kurti, ky ndryshe nga SHBA, shprehet dakortësi për heqjen e pjesshme të taksës.
“Unë e mirëprita njoftimin tuaj javën e kaluar për tarifat, që paraqet hap të parë të mirë në drejtim të duhur. Neve na duhet heqja e plotë e tarifave. Në këtë kontekst unë pajtohem plotësisht me ju se marrëveshjet e kaluara dhe obligimet e mbetura duhet të zbatohen plotësisht. Serbia, sikur Kosova, duhet t’i përmbushë zotimet për zbatimin e atyre marrëveshjeve”, thuhet nga Borrel.
Ai përcjell vlerësime për Kurtin, e kjo ndodh teksa Uashingtoni po sheh me dëshpërim vendimmarrjet e tij.
“Jam i kënaqur që marrëdhënien me BE-në e keni vënë si punë tuajën kryesore, kjo përputhet mirë me qasjen prioritare të BE-së ndaj të gjithë rajonit, përfshirë Kosovën”, shkruan Borrell, që gjithashtu njofton për emërimin e Lajçakut si të dërguarin europian.
“Në vijim të bisedës tonë të fundit telefonike, do të doja t’iu konfirmoj se unë tashmë ua kam propozuar edhe formalisht shteteve anëtare emërimin e Miroslav Lajcak, si përfaqësues special i BE-së për dialog dhe për Ballkanin Perëndimor, për të më asistuar mua si lehtësues i BE-së. Unë shpresoj që ai mund të fillojë punën sa më herët. Nga ana ime, unë zotohem të mbes afërsisht i angazhuar në këtë proces dhe të bëj më të mirën për ta çuar përpara sa më shpejtë dhe në mënyrë efektive. Nga një rezultat pozitiv do të përfitonin të dyja edhe Kosova edhe Serbia, rajoni i gjerë dhe vet BE-ja në fund”, thekson Borrell.
Për kryediplomatin e Brukselit, Albin Kurti duhet të jetë njeriu i dialogut me Beogradin.
“Unë besoj që si kryeministër ju do të udhëhiqni me negociatat në dialog në mënyrë gjithëpërfshirëse”, shkruan Borrell. /tesheshi.com/
