Presidentët e Rusisë dhe Shteteve të Bashkuara, Vladimir Putin dhe Joseph Biden, shprehën gatishmërinë të martën për të “vazhduar dialogun” në mënyrë që të garantojnë sigurinë globale, njoftoi Kremlini.
Rusia ka konfirmuar se Biden i propozoi Putinit për të organizuar një samit në të ardhmen e afërt, por nuk është specifikuar nëse presidenti rus e pranoi propozimin.
“Të dy palët kanë shprehur gatishmërinë për të vazhduar dialogun mbi çështjet më të rëndësishme të sigurisë globale, të cilat do të kënaqnin interesat jo vetëm të Rusisë dhe Shteteve të Bashkuara, por edhe të të gjithë bashkësisë ndërkombëtare,” tha Kremlini në një deklaratë.
Putin dhe Biden diskutuan gjithashtu tensionet në lidhje me Ukrainën, ndërsa Kievi dhe vendet perëndimore akuzojnë Moskën për grumbullimin e trupave në kufirin me Ukrainën, e cila aspiron për anëtarësim në NATO.
Presidenti rus theksoi nevojën për të zbatuar marrëveshjen e paqes për Ukrainën, të arritur në 2015 në Minsk.
Biden shprehu interes në “normalizimin e situatës” me Moskën dhe “krijimin e ndërveprimit të qëndrueshëm dhe të parashikueshëm për çështje serioze të tilla si stabiliteti strategjik dhe kontrolli i armëve, programi bërthamor i Iranit, situata në Afganistan dhe ndryshimi global i klimës”.
Marrëdhëniet midis Moskës dhe Uashingtonit janë të ulëta për shkak të mosmarrëveshjeve mbi një sërë çështjesh nga Ukraina në Siri, si dhe akuzave për ndërhyrje në zgjedhje, spiunazh dhe sulme kibernetike. /tesheshi.com/
