Historia të kujton atë të “Wargames”, filmin e vitit 1983 me protagonist një të ri, Matthew Broderick në versionin e një hackeri i cili hyri gabimisht në kompjuterin e ministrit të mbrojtjes së Amerikës dhe për pak sa nuk shkaktoi një luftë nukleare me Rusinë.
Në këtë rast, gabimi është më i vogël por ka patur një impakt të madh mediatik. Këtë ‘gabim’ duket se e ka kryer një djalosh në gjimnaz, i cili ka hackeruar llogarinë e postës elektronike të shefit të CIA-s, John Brennan nga ku ka marrë informacione shumë personale të publikuara nga Wikileaks: nga kodi fiskal tek pasaporta, numrat personalë telefonik, përfshirë edhe atë të telefonit të shtëpisë.
Fillimisht hackeri i ri arriti të futej në postën elektronike duke u shtirur si një punonjës i një prej agjencive më të mëdha të telefonisë në SHBA. Ka qenë një gjest demonstrativ, i cili ka krijuar jo pak siklet në selinë e CIA-s në Langley si dhe për Presidentin Obama, me të cilin Brennan ka pasur marrëdhënie dhe bashkëpunime të ngushta.
Mes informacioneve të publikuara nga Wikileaks ka pasur edhe të dhëna të ndryshme delikate të të afërmve dhe familjarëve të shefit të agjencisë amerikane, duke nisur nga prindërit, bashkëshortja Kathy si dhe emaile të klasifikuara si sekrete dhe tepër të rëndësishme.
Dokumentet e publikuara datojnë që prej vitit 2008 dhe në vitet në vijim, kur Brennan nuk ishte emëruar ende shef i CIA-s (në vitin 2013). Mes të dhënave të para ka qenë edhe draft ligji i ri i hartuar për marrjen në pyetje, në vitin 2008, një shkëmbim opinionesh mes Bernnan dhe senatorit republikan të Missouri-t, i cili në atë kohë ishte pjesë e komisionit të Senatit që merrej me inteligjencën dhe propozimin për ti besuar ish sekretarit të shtetit amerikan Colin Powell menaxhimin e raporteve me Iranin, të cilat kishin në optikën e tyre marrëveshje të reja me Shtetet e Bashkuara të Amerikës./tesheshi.com/
