Agjencia Evropiane e Hapësirës (ESA) pritet të lëshojë orën atomike më precize ndonjëherë – “Faraoni” – në Stacionin Ndërkombëtar të Hapësirës (ISS), me qëllim të testimit të parashikimeve të teorisë së përgjithshme të relativitetit të fizikanit Albert Einshtein.
Ora, me madhësinë e një frigoriferi të vogël, do të vendoset në pjesën e jashtme të modulit ISS, në një lartësi prej rreth 400 kilometrash.
Nisja në një raketë SpaceX Falcon 9 është planifikuar për në orën 4:15 të mëngjesit me orën lokale nga Qendra Hapësinore Kennedy e NASA-s në Florida.
“Faraoni”, rezultat i gati tre dekadave të kërkimit, përdor dy gram cezium, një metal thelbësor për përkufizimin e një sekonde. Falë ftohjes së atomeve të ceziumit në pothuajse zero absolute, ora do të jetë në gjendje të matë kalimin e kohës me saktësi të jashtëzakonshme, sipas shkencëtarëve.
Testimi i efekteve të relativitetit
Në orbitë, koha rrjedh pak më shpejt se në sipërfaqen e Tokës – një ndryshim prej një sekonde çdo 300 vjet. Duke krahasuar rezultatet e “Faraonit” me orët atomike në Tokë, shkencëtarët duan të testojnë me saktësi efektet e relativitetit dhe ndoshta të gjejnë anomali që do të hapnin rrugën drejt unifikimit të relativitetit të përgjithshëm dhe mekanikës kuantike.
Përtej pyetjeve themelore të fizikës, gjenerata e re e orëve ultra precize mund të ketë edhe aplikime praktike – nga matja e saktë e ndryshimeve në lartësi deri tek monitorimi i lëvizjes së ujërave nëntokësore dhe naftës.
Misioni i orës do të zgjasë të paktën 18 muaj. /tesheshi.com/
