Punësimi i militantëve të partive në shkollat e Kosovës është bërë një gjë normale ku persona të caktuar pa kualifikime adekuate japin lëndë të ndryshme mësimore.
Këtë gjë e ka identifikuar edhe Auditi në raportin për komunën e Fushë Kosovës, ku një person është punësuar të japë lëndën e matematikës ndërsa me profesion është sociolog, pra i një lamie krejt tjetër.
“Komuna e Fushë Kosovës ka angazhuar me vendim dy mësimdhënës për lëndët e Gjuhës Shqipe dhe Matematikë në shkollën fillore e mesme e ulët ‘Selman Riza’, në kohëzgjatje prej tre muajsh. Njëri mësimdhënës me kualifikim Bachellor i Sociologjisë është pranuar për lëndë të matematikës. Në anën tjetër, të punësuarve nuk u janë paguar kontributet pensionale dhe tatimi në pagë, siç kërkohet me Ligjin për tatimin në të ardhurat personale nr. 03/L-161”, thuhet në raportin e Auditit.
Sigurisht se ky nuk është rasti i vetëm pasi edhe në shumë shkolla tjera ka të punësuar persona që japin lëndë jo adekuate dhe kjo praktikë sigurisht pritet të vazhdojë edhe këtë vit kur dihet se mbahen zgjedhjet komunale dhe se mësimdhënësit zgjedhen pikërisht nga drejtoritë komunale. /tesheshi.com/
