Një ngjarje e pazakontë ndodhi sot teksa i penduari i nja bande tritoli, Julian Sinanaj, i ka telefonuar një televizioni informativ nga brenda qelisë duke denoncuar së pari proçesin gjyqësor ndaj tij. Ai është ankuar se prej muajsh nuk ka asnjë avokat, ndërkohë që ka vijuar me akuza, të cilat me gjasë do trazojnë politikën në ditët e ardhshme. Ai ka akuzuar ish-Drejtorin e Përgjithshëm të Policisë së Shtetit, Artan Didi, se e ka kërcënuar të mos flasë, posaçërisht për vrasjen e Ilir Karçinit, gjatë kohës që kanë qenë i shtruar në spitalin e burgut.
Dhe gjithashtu ka thënë se gjyqtarin e Gjykatës së Vlorës, Skerdilajd Konomin, e kanë vrarë njerëz të veshur me pushtet. Sipas tij, në vrasjen e Konomit janë të implikuar deputetë të cilët dalin e flasin në televizor. Ndërsa si një ndër urdhëruesit e vrasjes së bujshme, ka përmendur një person në Shkodër të arrestuar kohë më parë, që të çon ndërmend një prej dy deputetëve të njohur, që kohët e fundit kanë qenë në qendër të disa zhvillimeve me natyrë politiko-kriminale.
Rrëfimi nga brenda qelisë i Sinanajt është ndërprerë, pasi me gjasë kanë ndërhyrë gardianët e burgut, pasi autoritetet kanë parë në televizor rrëfimin e pazakontë live të tij. /tesheshi.com/
