Një bisnesmen i njohur ka akuzuar dy deputetë të Partisë Demokratike të Kosovës se i kanë kërkuar gjobë dhe kanë dërguar njerëz për ta sulmuar fizikisht.
Eroll Vitaku, në emisionin “Puls” të KTV ka përmendur deputetët Latif Gashi dhe Rustem Mustafa, të dy ish-komandantë të UÇK-së.
Vitaku është përfaqësues i markës sportive “Asiks” për Kosovë dhe Shqipëri dhe i cili zhvillon këtë veprimtari prej vitit 2003 në pallatin e rinisë në Prishtinë dhe Mitrovicë.
“Unë jam sulmuar nga një grup i përbërë nga Artan Ratkoceri, jurist sipas tij, djali i axhës së tij, Shkumbin Ratkoceri, jurist, i cili ka pasur edhe foto në Facebook që ka qenë kandidat për asamblenë komunale me numër 23 të PDK-së për komunën e Podujevës. Këta dy janë arrestuar por jam sulmuar edhe nga dy persona tjerë që për çudi janë ende në arrati.
“Këta djem janë thirrur gjithmonë në emër të Komandant Remit dhe Komandant Latif Gashit, pra dy deputetëve, dhe thirren në emër të luftës së UÇK-së. Unë besoj se edhe ata persona në emër të të cilëve thirren këta, janë lodhur nga këta persona që kërkojnë haraç. Më kanë kërcënuar, më janë futur në lokal duke më kërcënuar”, tha Vitaku.
Ndërkaq, Baki Kelani, zëdhënës i Policisë së Kosovës, theksoi se policia do të bëjë gjithçka që është e mundur t’i sigurojë qytetarët që raste të këtilla të mos ndodhin.
Ndaj kësaj deklarate ka reaguar komandant Lata, i cili, është distancuar ga kjo ngjarje duke shprehur keqardhjen për ngjarjen. Ai në një prononcim telefonik në emisionin Interkativ të KTV-së, ka thënë se është ndjerë tejet keq nga këto deklarata.
Ai ka thënë se me afaristin Vitaku njihet prej vitesh dhe ka theksuar se Vitaku duhet të kishte folur direkt me të për këto ngjarje.
“Unë dhe familja ime u ndjemë shumë keq të ofenduar kur në debatin televiziv në emisionin “Puls” u përmend edhe emri im nga një qytetar i Republikës, nga një afarist i nderuar siç është Eroll Vitaku të cilin personalisht e njoh dhe kam, besoj, raporte të mira me të. U shqetësova më së shumti duke qenë se prej 7 vitesh ka pasur mundësi të më kontaktojë me miliona herë dhe të më thotë, ‘Latë, dikush po thirret në emrin tënd’. Më erdhi shumë keq nga ai që ka 7 vjet që u paguan gjobë personave të pandërgjegjshëm dhe sot thotë se kanë përdorur emrat e ‘filanit’ apo ‘fistekut’. Ky ishte shqetësimi më i madh i imi, ndaj të gjithë qytetarëve të Republikës ju garantoj se kurrë në jetën time nuk kam kërcënuar njeri. Tërë jetën time jam munduar të jem në dispozicion të të drejtave të tyre dhe lirinë fizike time dhe familjes time e kam sakrifikuar gjithherë për me qenë të lirë qytetarët. U ndjeva shumë keq që ai ka pësuar lëndime fizike nga njerëz të pandërgjegjshëm të cilët aq më keq kanë përdorur emrat tanë, nëse janë thirrur, po flas duke i besuar Erollit, edhe pse e shoh veprim jo-burrëror dhe jo-qytetar i cili për shtatë vjet u ka dhënë gjobë njerëzve duke njollosur emra e duke mos e denoncuar rastin në polici”.
