Më shumë se 300 ligjvënës nga e gjithë bota i kanë bërë thirrje Fondit Monetar Ndërkombëtar dhe Bankës Botërore të anulojnë borxhet e vendeve më të varfëra në përgjigje të pandemisë dhe të rrisin mbështetjen financiare për të parandaluar një kolaps ekonomik global.
Nisma, e udhëhequr nga ish-kandidati presidencial Bernie Sanders dhe deputetja Ilham Omar, një demokrate nga Minesota, erdhi në një kohë kur frika po rritet se vendet në zhvillim dhe ekonomitë më të dobëta do të pësojnë efektet shkatërruese nga pandemia.
Virusi ka infektuar më shumë se 4.2 milion njerëz në të gjithë botën dhe u ka marrë jetën pothuajse 290,000 të tjerëve.
Sanders tha se vendet e varfra kanë nevojë për çdo qindarkë për popujt e tyre, në vend që të paguajnë “borxhet e paqëndrueshme” të institucioneve të mëdha financiare.
Anuloni plotësisht pagesën e borxheve
Zbritja e borxheve për vendet më të varfra është “më e pakta që Banka Botërore, FMN dhe institucionet e tjera financiare duhet të bëjnë për të parandaluar rritjen e paimagjinueshme të varfërisë, urisë dhe sëmundjeve, të cilat kërcënojnë qindra miliona njerëz”, shtoi senatori amerikan, sipas Reuters.
Deputetët përshëndetën veprimin e FMN për të mbuluar pagesën e borxheve të 25 vendeve më të varfëra për një periudhë gjashtë mujore, por thanë se përpjekje të mëtejshme ishin të nevojshme.
Parlamentarët nga më shumë se 20 vende nga të gjashtë kontinentet thanë në letër se pagesa e borxheve të vendeve më të varfëra duhet të anullohet plotësisht, në vend që të pezullohej, siç u mor vesh nga vendet e G20 në prill.
Teksti thotë se, përndryshe, këto vende nuk do të jenë në gjendje të realizojnë përparësi të shpenzimeve në luftën kundër koronavirusit, dhe kjo mund të çojë në një ndërprerje të vazhdueshme në zinxhirin e furnizimit global dhe tregjet financiare. /tesheshi.com/
